Томуу, томуу төст өвчний одоогийн нөхцөл байдал, томуугаас хэрхэн урьдчилан сэргийлэх талаар Эрүүл мэндийн яамyаас өнөөдөр мэдээлэл хийлээ. ЭМЯ-ны газрын дарга Д.Нарангэрэл “Шинэ жилийн баяраар бага насны хүүхдээ дагуулж олон нийтийн газраар явснаас болж халдвар авах эрсдлийг нэмэгдүүлсэн. Энэ нь сүүлийн тав хоногт эмнэлэгт хэвтэх хүүхдийн тоо эрс нэмэгдсэнээс харж болно. Түүнчлэн сүүлийн хэд хоногт насанд хүрэгчид олноор томуугаар өвчилсөн нь хүүхэд халдварлах гол шалтгаан болсон. Нөгөөтэйгүүр, хүүхдээ цэвэр агаарт гаргахдаа дааруулж, хөлөргөснөөс болж уушгины хатгаагаар хүндрэх тохиолдол нэмэгдлээ. А хүрээний буюу H1N1 вирус нь бага насны хүүхдийг уушгины хатгалгаагаар өвчлүүлдэг. Томуугийн улирал эхэлсэн тул ДЭМБ-д хүсэлт тавьж, вирүсийн онцлогт тохирсон тамифлю эмээс 1200 хүүхэд, 500 хүний тун авч байгаа. ХӨСҮТ-ийн нөөцөд байсан 500 тунг хүүхдийн эмнэлгүүдэд хуваарилсан. Энэ эмийг нэг хүртэлх насныханд хэрэглэх ёсгүй гэдгийг анхаарах хэрэгтэй” гэлээ.
Томуугийн сонгомол вирүс H1N1 нь маш хурдан хатгалгаа үүсгэдэг бол амьсгалын замын синцитиаль вирус нь халуурахгүй ханиалгах, хоолой өвдөх, нусгайрах шинж тэмдэг илэрч, уушгины хатгаа, бөглөрөлт, гуурсан хоолойн багтрал үүсгэж, амьсгалын дутагдалд оруулдаг аж.
Мөн короновирүс нь ханиадны шинж тэмдэг бага илэрч байгаад уушгины хатгаа үүсгэдэг бол бокавирүс нь ерөнхий хордлогын шинж тод илэрч, залгиур улайна, цэртэй ханиалгаж хатгаа үүсгэнэ ажээ. Түүнчлэн аденовирүс нь нус гоожих, толгой өвдөх, гүйлгэж суулгах шинж илэрч, хатгаагаар хүндэрч, ходоод гэдэсний замын үрэвсэл үүсгэдэг байна.
Мөн томуугийн В дэд хэв шинжийн вирүсээр өвчилсөн үед халууралт өндөр, хордлогын шинж тэмдэг түлхүү илэрч, хурдан хүндэрч, уушгины хатгаа болж, удаан хугацаагаар цэртэй ханиалгадаг байна.
ЭХЭМҮТ-ийн төвийн эмч Б.Бат-Амгалан “А хүрээний H1N1 вирусийн тархалт түгээмэл байна. Бага насны хүүхдүүд өндөр халуурч, халуурснаас таталт өгөх, өвчин хүндрэх зэрэг хүндрэл их гарч байна. Томуугаар 0-2 насныхан голдуу өвдөж байна. Мөн гурваас дээш насныхан томуугаар өвчилж, дээр нь төвөнхийн бачуурал болж хүндрэх тохиолдол их бий. Хүүхэд өвдсөн тохиолдолд хүүхдийнхээ халууныг тогтмол хянаж, 38.5-аас дээш халуурвал халуун бууруулах эм уулгах, шингэн сайн уулгах хэрэгтэй. Хүүхдээ өвчлөхөөс сэргийлэх тал дээр эцэг, эхчүүд онцгой анхаарч, олон нийтийн газраар авч явахгүй байхыг зөвлөе. Хүүхдийг цэцэрлэгт нь явуулахдаа амны хаалт зүүлгэж занших хэрэгтэй. Аарц, чацаргана зэрэг амин дэмээр баялаг хүнс, витамин, ногоогоор баяжуулсан хүнс өгөх хэрэгтэй байна” гэв.
ЭХЭМҮТ-ийн төвийн эмч Б.Ариунхишиг “Томуугийн дэгдэлт их байгаагаас эмнэлгүүдийн ачаалал эрс нэмэгдсэн. Томууг гэрийн нөхцөлд эмчлэх боломжтой. Эмнэлгүүд тухайн хүүхдийг үзээд гэрээр эмчлэх боломжтой бол 2-3 хоногийн давтамжтайгаар дахин үздэг. Эцэг, эхчүүдийн дунд ханиадыг дутуу эмчилж байна гэсэн ойлголт байна. Хүүхдийн дархлааг дэмжээд өгвөл ханиад эдгэх ёстой. Харин тухайн хүүхэд суурь эмгэгтэй, хавсарсан өвчинтэй бол эмнэлэгт хэвтүүлдэг. Ингэснээр томуугийн хурц үеийг дардаг. Томуу нь 5-7 хоногийн дотор халуурдаг. Мөн томуугийн эмчилгээ 5-7 хоног хийгдэж байгаа бөгөөд энэ хугацаанд бүрэн эдгэрсэн гэж үзэх нь буруу гэлээ. Харин өндөр халууруулж болохгүй” гэлээ.
