ЗТХЯ-ны алба хаагчид нэгнийхээ аминд хүрсэн шарх аниагүй байхад Улаанбаатар-Дорноговь чиглэлийн автобус осолдож хоёр иргэн амиа алдаж, 31 иргэн хүнд бэртсэн харамсалтай явдал өнөөдөр өглөө гарлаа. Үүнээс өмнө төмөр зам дагасан осол аваар шил шилээ дарж гарсаар 2018 оныг арай хийж үдсэн гэхэд болно. Салбарын асуудал хүндэрч, иргэдийн амь нас хохирч байх энэ цаг үед ЗТХЯ-ны Төрийн бичгийн даргыг хууль бусаар томилуулахаар улайрч буй гэх бор шувуу ниссэн юм. Тодруулбал, Төрийн албаны зөвлөлөөс 2018 оны арванхоёрдугаар сарын 28-нд Засгийн газрын хэрэг эрхлэх газарт ЗТХЯ-ны Авто тээврийн бодлогын хэрэгжилтийг зохицуулах газрын дарга С.Батболдыг Төрийн бичгийн даргаар томилуулах санал хүргүүлжээ. Үүнийг нь Засгийн газрын маргаашийн хурлаар хэлэлцүүлэхээр болсон байна.

Угтаа бол 2019 оны нэгдүгээр сарын 1-нээс хэрэгжиж эхэлсэн Төрийн албаны тухай хуулийн шинэчилсэн найруулгаар оны өмнө тасалбар болсон хуучин хуулийг хэрэгжүүлж, хуучин хуулийн зүйл, заалтаар Төрийн албаны зөвлөлөөс санал болгосон хүнийг ЗГХЭГ хүлээн авч, Засгийн газрын хуралдаанаар томилж ажиллуулах нь хууль зөрчсөн үйлдэл болох юм. Өөрөөр хэлбэл, хуучин хууль хэрэгжиж байх үед нэр дэвшсэн хүний нэрийг шинэ хууль хэрэгжиж эхэлсэн үед баталж, албан тушаалд томилох нь хууль бус үйлдэл гэсэн үг. Тэр тусмаа салбарт тулгамдаж буй асуудлууд хурцдаж, осол аваар шил шилээ даран гарч буй энэ цаг үед бодлого, зохион байгуулалтаар хангаж ажиллах ёстой Авто тээврийн бодлогын хэрэгжилтийг зохицуулах газрын дарга С.Батболд “муу ажиллаж байна” гэж хэвлэлээр цөөнгүй удаа бааллуулсан. Ийм хүнийг хууль бусаар томилчихоод “Салбарын асуудлыг шийд ээ” гээд даатгавал ЗТХЯ хамраараа газар хатгана уу гэхээс асуудлыг шийдээд, шийдвэрлэж чадна гэдэгт лав итгэхгүй гэдргийг учир мэдэх хүмүүс хэлж байна.

Эцэст нь хэлэхэд, ЗТХЯ-нд тушаа болох хууль бус Төрийн нарийн бичгийн дарга бус харин салбарт тулгамдсан асуудлыг шийдвэрлэж чаддаг хүнийг хуулийн хүрээнд томилох нь Засгийн газрын үүрэг гэдгийг санахад илүүдэхгүй биз ээ.

Г.Эрдэнэ