Анх 1994 онд Увс аймагт 10 га талбайд чацаргана тариалж эхэлсэн “Хаан жимс” компанийн үйл ажиллагаа өргөжсөөр 2016 оны арваннэгдүгээр сард евро стандартын шаардлагыг бүрэн хангасан “Хуба Хаяа” чацарганы үйлдвэрийг ашиглалтад оруулсан юм.
Тэгвэл өнөөдөр “Хуба Хаяа” чацарганы үйлдвэр олон улсын чанарын удирдлагын тогтолцоо ISO22000:2005 буюу хүнсний аюулгүй байдлын удирдлагын тогтолцоог амжилттай нэвтрүүлж олон улсад нэр хүндтэй Швейцарын “SGS” баталгаажуулалтын байгууллагаас албан ёсны батламжаа гардлаа.
Батламж гардуулах үеэр “SGS”компанийн гүйцэтгэх захирал Клипп Зэн “Компаниа төлөөлөн ISO22000:2005 хүнсний аюулгүй байдлын удирдлагын тогтолцооны гэрчилгээ олгохоор болсон нь миний хувьд нэр төрийн хэрэг. Энэхүү хүнсний аюулгүй байдлын удирдлагын тогтолцоо нь хүнсний аюулгүй байдлыг тодорхойлох, хянах боломжийг олгодог. Мөн олон улсад хүнсний бүтээгдэхүүний борлуулалт хил давах болсон учраас дэлхий дахины хүнсний аюулгүй байдлыг хангахын тулд олон улсын стандартыг хэрэгжүүлэх нь зүйтэй. “Хаан жимс” ХХК энэ жил ихээхэн хүчин чармайлт шаардсан, сорилт бүхий жил байсан. Үүнийхээ үр дүнд энэ хүү стандартын батламжийг гардлаа. Энэ хүнд бэрх ажлын ард амжилттай гарч чадсан хүн бүрт баяр хүргэе. Энэ бол сайн багийн ажил. Та бүхэнд баяр хүргэж, амжилт хүсье” гэв.
Тус үйлдвэр нь Германы “НИГ” компанийн инженеринг, зураг төслийн дагуу хийгдсэн, евро стандартын шаардлагыг бүрэн хангасан бөгөөд ISO22000:2005 стандартыг хэрэгжүүлснээр түүхий эд бэлтгэл, боловсруулалт, үйлдвэрлэлт, хадгалалт, тээвэрлэлт, түгээлтээс эцсийн хэрэглэгч хүртэлх бүхий л шат дамжлагад хүнсний аюулгүй байдлын хяналт шалгалтыг хийх юм байна.
Мөн тус компани өнгөрсөн хоёр жилийн хугацаанд эрүүл органик чацарганы охь, чацарганы зөөлөн эмийн тос, үрийн тос, “Өглөөний мэнд” чацарганы нухаш зэрэг бүтээгдэхүүнээ Тайвань, Япон, Хятад, Солонгос, Герман зэрэг улсуудад экспортолжээ. Энэ нь Монгол үйлдвэрлэл дэлхийд танигдаж эхэлсний тод жишээ болсны зэрэгцээ чанар стандартаар дэлхийн жишигт хүрсний нотолгоо болж байна.
Дашрамд дурдахад “Хаан Жимс” компани Увс, Сэлэнгэ аймгуудад 100 га талбайд чацаргана, үхрийн нүд тариалдаг. Мөн Улаанбаатар хотоос 50 километрийн зайд Туул голын эрэг дээр Чингис хааны өвөлжөөний газарт чацаргана тариалж байна.
Л.Сайнбаяр
