УИХ-ын чуулган үргэлжилж байна. Энэ үеэр гишүүд улс төр, бизнес хоёрт зааг оруулах шаардлагатайг онцолж байна. Ингээд гишүүдийн саналаас хүргэе.

УИХ-ын гишүүн О.Баасанхүү:ЖДҮ-чдийг чөлөөлөх ажилд хамтарч ажиллах хэрэгтэй

Б.Батзориг гишүүн ЖДҮ-ийг тайлбарлаж байна. Хэрэв үнэхээр сэжигтэн ялладаг болчихсон байвал ийм юм ярихгүй шүү дээ. Жирийн иргэд шалгагдах, хууль тогтоох байгууллагын тусгай гишүүн шалгагдах хоёр өөр. Шударга бусын хонгил байдаг тухай би мэдсэн. Их Хурлын гишүүн байна уу, сайд байна уу хэнд ч ялгавартай хандаж болохгүй.

Жирийн хүн байсан ч тэр. Жишээ нь, Хүнс, хөдөө аж ахуй, хөнгөн үйлдвэрийн яаманд малын төсөл орж ирсэн бол би ойлгосон. Гэтэл хүн эмнэлгийн төсөл гэж оруулаад түүнийгээ үйлдвэр гээд авчихсан сайд сууж байна. Өчигдөр байнгын хорооны хурал дээр нэлээд тодорхой зүйл сонссон. Тэдгээр чинь бүгд асуудал шүү. Хуулийн байгууллагынхны ажилд туслах ёстой. Гэм буруутай эсэх асуудал нь тогтоогдох ёстой. Гэм буруутай гэж баахан асуудал гаргачихаад дараа нь цагаадвал энэ хууль хяналтын байгууллага жинхэнэ хохирогч байдаг юм байна гэж ард түмэн шүүн тунгаах боломжтой. Тиймээс ЖДҮ-чдийг чөлөөлөх асуудалд хуулийн байгууллагатай хамтран ажиллая.

 Ш:Раднаасэд: Томчуудын компани лиценз, концессоос хол байх ёстойг харууллаа

Энэ асуудал төрийн өндөр албан тушаалтнуудын хувьд том сургамж. Ганцхан ЖДҮ-ийн асуудал биш. УИХ-ын гишүүдийн хамаарал бүхий компаниуд тендер орвол ялуулахгүй. Ямар нэгэн байдлаар оролцсон бол өөрөө гэмт хэрэг болно.

Цаашлаад лиценз, концесс зэрэг хол байх естойн том жишээ шүү. Өөр олон асуудал байнаа цааш нь тултал нь шалга. Болохгүй бол Ерөнхий прокурор долоо хоног бүр мэдээлэл хийж бай. Ингэж байж бид энэ нийгмээ цэвэрлэж чадна. Түүнээс өнөөдөр гурав, дөрвөн гишүүний талаар яриад замхраад өнгөрөх бол байдаг л нэг үзэгдэл болоод өнгөрнө. Бизнесээ хий, эсвэл улс төрийн ажлаа хий.

М.Оюунчимэг: Салбарын сайд нь хуулийн дагуу зээл олгосон гэж хэлсэн

Салбарын сайдын хэлсэнчлэн УИХ-ын гишүүд 27 сангаас 100 сая төгрөгийн зээл авч болохгүй гэсэн дүрэм байгаа бол тендер, концесс, лиценз гээд бизнес хийж байгаа хүмүүс хувьдаа авах хориотой гэсэн дүрмийг маш тодорхой болгож, УИХ-аар батлах хэрэгтэй.

Ингэвэл ЖДҮ-ийн зээл авсан, аваагүй. Хууль зөрчсөн, зөрчөөгүй нь тодорхой болно. Сая салбарын сайд хэллээ. Хуульд заасан дүрмийн дагуу зээл олгосон гээд. Тэгэхээр энэ бүхнийг шийдэх гол зүйл нь улс төрчдийн ёсзүйн дүрмийг тодорхой болгож хуульчлабал ямар нэгэн хувьцаа эзэмшдэг төрийн өндөр албан тушаалтан төрөөс зээл авч болохгүй юм байна гэдгийг мэддэг болно. Үүнийг мэддэг хүмүүс улс төр рүү хошуурахгүй байж магадгүй.

Б.Лхам