Энэ сарын 12-13-ныг шилжих шөнийн 01.00 цагийн үед БЗД-ийн цагдаагийн Нэгдүгээр хэлтэст зодоон болж буй дуудлага  иржээ. 

Эх сурвалжийн мэдээлснээр дуудлагын дагуу БЗД-ийн цагдаагийн нэгдүгээр хэлтсийн албан хаагчид Баянмонгол хороололд очиход ЦЕГ-ын Дотоод хяналт шалгалтын хэлтсийн хурандаа н.Ариунбат, Нийслэлийн цагдаагийн газрын Хэв журмын хэлтсийн дэд хурандаа н.Отгонжаргал нар н.Ариунбатын гэрт согтууруулах ундаа хэрэглэж байгаад хоорондоо маргалдан зодолдож, улмаар нэгнийхээ толгойд гэмтэл учруулсан байжээ. Гэхдээ гэмтлийн зэрэг харьцангуй гайгүй гэдгийг эх сурвалж мэдээлж байна. Хэргийг өдгөө БЗД-ийн цагдаагийн нэгдүгээр хэлтэст шалгаж байгаа бөгөөд тэд хувийн шинжтэй маргаанаас болж хоорондоо нударга зөрүүлсэн байна. 

Цагдаагийн удирдлагуудын зүгээс уг хэргийг ихэд нууцалж, чимээгүйхэн шалгахыг хүсч байгаа бөгөөд албан хаагчидтай холбоотой хэрэг тул ЦЕГ-ын Дотоод хяналт шалгалтын хэлтэст шалгах ёстой боловч архи дарс, зодоон цохионы шинжтэй тул харьяаллын дагуух цагдаагийн хэлтэст нь шалгаж байгаа ажээ. Энэ талаар цагдаагийн газраас лавлахад “Тодруулахаар ажиллаж байна” гэлээ.

Л.Сайнаа