Эрчим хүчний яамнаас агаарын бохирдлыг бууруулах чиглэлээр хоёр үндсэн ажлыг хийж байгаагийн нэг нь айл өрхүүдийн эрчим хүчний чадлыг нэмэгдүүлэх чиглэлд анхаарч ажиллаж байгаа явдал юм.
Тодруулбал, нийслэлийн 42 мянган айл өрхийг 4 кв-ын халаагуур цахилгаантай холбох боломжийг бүрдүүлэх ажлыг хийж байна. Энэ ажил дуусах шатандаа ороод байгааг Эрчим хүчний сайд Ц.Даваасүрэн хэллээ.
Өөрөөр хэлбэл дээрх тооны айл өрх дулааны асуудлаа цахилгаанаар шийдвэрлэх боломж бүрдээд буй.
Мөн энэ тавдугаар сарын 15-наас түүхий нүүрсийг ахуйн хэрэглээнд ашиглахгүй болсонтой холбогдуулан түүхий нүүрсийг орлох сайжруулсан шахмал түлшний үйлдвэрийг өнгөрсөн оны сүүлээр ашиглалтад оруулсан бөгөөд эхний шугамаар 200 мянган тонн орчим сайжруулсан шахмал түлш жилд үйлдвэрлэх аж.
Түүнчлэн нэмж дахин хоёр шугамын өргөтгөлийг ойрын хугацаанд хийх бөгөөд ингэснээр жилд 600 мянган тонн сайжруулсан шахмал түлш үйлдвэрлэдэг болох юм байна.
Эрчим хүчний сайд Ц.Даваасүрэн “Эхний хагас жилд багтаад нөөцөө бэлдэж, нийлүүлэлтийг бүрэн хангах чиглэлээр ажиллаж байна. Лабораторийн туршилтаар сайжруулсан шахмал түлш агаарын бохирдлыг 70 хувь бууруулж байна” гэв.
Л.Сайнаа
Сэтгэгдэл (3)