Дорноговь аймгийн нутаг дэвсгэрт орших Хамрын хийд энергийн төвөөс долоон км-ийн зайд БНХАУ-ын 100 хувийн хөрөнгө оруулалттай “Даблью Эс Жи Эл” компани 2007 онд нүүрс олборлох ашиглалтын лиценз авсан талаар бид өчигдөр мэдээлсэн.
Энэ талаар Дорноговь аймгийн Засаг дарга Т.Энхтүвшин “Аймгийн удирдлагын зүгээс уг газрын ашиглах эрхийг өөр газар руу шилжүүлэх эсвэл зөвшөөрлийг нь цуцалж өгөхийг холбогдох газруудаас шаардаж байна. Ер нь тусгай хамгаалалттай газар гэдгийг мэдсээр байж ашиглаж болно гэж шийдвэр шүүх гаргах нь сонин. Одоогоор “Даблью Эс Жи Эл” компанийн үйл ажиллагааг аймгийн Мэргэжлийн хяналтын газар, Цагдаагийн газраас хаасан байдалтай байна” гэсэн тайлбарыг өгсөн юм. Тиймээс дээрх тусгай зөвшөөрөл авсан газар нь орон нутгийн тусгай хэрэгцээний газрын кадастрын зургийн гадна талд багтаж байгаа эсэхийг тодруулахаар АМГТГ-ын Кадастрын хэлтсийн дарга Д.Дашзэвэгтэй холбогдсон юм. Тэрбээр ““Даблью Эс Жи Эл” компанийн үйл ажиллагааны зөвшөөрлийг анх 2009 онд олгож, ашиглалтынх болгосон. Харин уг зөвшөөрлийг өгсний дараа тус газар нутгийг орон нутгийг хэрэгцээнд авсан. Ашигт малтмалын тухай хуулийн 14.4-т “Хүчин төгөлдөр хайгуулын болон ашиглалтын тусгай зөвшөөрлөөр олгогдсон талбайг бүхэлд нь, эсхүл хэсэгчлэн тусгай хэрэгцээнд авснаар тусгай зөвшөөрөл эзэмшигч ашигт малтмал эрэх, хайх, ашиглах боломжгүй болсон бол тухайн шийдвэр гаргасан байгууллага тусгай зөвшөөрөл эзэмшигчид нөхөх олговрыг нэг жилийн дотор төлнө” гэх хуулийнхаа шийдэгдсэн.
Хамрын хийд орчмын газар лиценз ашиглах зөвшөөрлийг орон нутгийн газраас зөвшөөрөл өгч, АМГТГ-т хүсэлт гаргасны дагуу олгогддог. Гэтэл уг хэргийг өөрсдөөсөө бултуулж, АМГТГ буруутай юм шиг харагдуулж байна. Ингэхээ болих хэрэгтэй” гэв.
Албаны эх сурвалжаас авсан мэдээлэл зөрүүтэй байгаа тул бид энэ талаар нэхэн сурвалжлах болно.
Б.Лхам
Сэтгэгдэл (2)