Хөдөлмөрийн баатар, Ардын уран зохиолч, Соёлын гавьяат зүтгэлтэн Б.Бааст хорвоогийн мөнх бусыг үзүүллээ. Тэрбээр өнгөрсөн оны арванхоёрдугаар сарын 28-нд Хөдөлмөрийн баатар цолоор энгэрээ мялаалгаад байсан билээ. Төрийн тэргүүнээс шагнал хүртсэнийхээ дараа “100 насныхаа босгон дээр төр түмний хишиг ийм өндөр шагнал авсандаа баярлаж байна. Монгол Улсдаа 86 жил завсаргүй зүтгэсэн хүн. Тиймээс төр минь үнэлж энэ шагналыг өгсөн байх гэж бодож байна. Нас минь хэдий дээр гарсан ч хоёр таягтайгаа байгаа. Миний хоёр таяг бол бичих, унших хоёр" хэмээн ярьж байв.
Хөдөлмөрийн баатар, Ардын уран зохиолч, Соёлын гавьяат зүтгэлтэн Б.Бааст нь Монголын шинэ үеийн уран зохиолын "амьд архив" төдийгүй зохиолч, уран бүтээлчдэд үлгэр дуурайл болсон, XX зууны их утга зохиолын томоохон төлөөлөгчийн нэг билээ. Тэрбээр МЗЭ-ийн шагналыг 1966 онд "Намрын уянга", "Дарьсүрэн" туужаараа, Д.Нацагдоржийн нэрэмжит шагналыг 1969 онд "Хангайн бор" тэргүүтэй холбоо туужаараа хүртсэн бөгөөд 1999 онд Монгол улсын соёлын гавьяат зүтгэлтэн цол, 2006 онд Монгол Улсын ардын уран зохиолч цолыг тус тус хүртсэн юм.
Монголын утга зохиолын салбарт хэмжээлэшгүй их үнэт хувь нэмэр оруулсан тэрбээр зургаадай таягаа тулаад буцлаа.
Л.Сайнбаяр