ЗТХ-ийн яаманд гарсан хүн амины хэрэгт сэжигтнээр татагдсан Б.Махбалд холбогдох шүүх хурал тун удахгүй эхлэх гэж байна. Шүүх хуралд сэжигтэн өөрийн биеэр оролцоно гэдгийг Цагдан хорих 461 дүгээр ангиас мэдэгдсэн. Тэгвэл уг хэргийн хохиогч Т.Гомбосүрэн нь бусдаас их хэмжээний мөнгө өгөлцөж, авсан гэх бичлэг олон нийтийн сүлжээгээр цацагдсантай холбогдуулан талийгаачийн өмгөөлөгч З.Хүрэлсүх тайлбар хийлээ. Тэрбээр “Энэ оны нэгдүгээр сарын 1-ний өдөр талийгаач Т.Гомбосүрэнгийн аав Р.Төмөрхуяг хорт хавдрын улмаас таалал төгссөн. Эцэг хүнийхээ хувьд талийгаачийн хэргийг үнэн зөвөөр шийдэгдэхийг хүлээж байсан ч энэ их сэтгэлийн дарамт өвчний үйл явцыг хурдасгасан байх. Сүүлд талийгаачийг их хэмжээний мөнгө авсан гэх ташаа мэдээлэл тараасан нь хүртэл сэтгэл санаанд нь хүнд туссан. Тиймээс одоо энэ бүх асуудалд албан ёсоор хариулт өгөх цаг болжээ.
Нэгдүгээрт, олон нийтийн сүлжээгээр цацагдсан бичлэг дээр гарч байгаа байр бол ЗТХ-ийн яамны ажлын байр биш.
Хоёрдугаарт, талийгаачид уул уурхайн лиценз байгаагүй.
Гуравдугаарт, ямар нэг лиценз зарсан гэсэн асуудалтай талийгаач огт холбоогүй. Бичлэг дээр яригдаж байгаа мөнгө бол хоёр компани гэрээ байгуулж, талууд хоорондоо зөвшилцсөний үндсэн дээр гэрээний дагуу хүлээлгэн өгч байгаа дүрс. Тухайн үед талийгаач Зам тээврийн яаманд ажилладаггүй, өмгөөлөгчөөр ажилладаг байсан бөгөөд дээрх үйл явдлыг баримтжуулж, бэхжүүлж авсан дүрс бичлэг юм.
Энэ хэрэгт холбогдсон этгээд, сэжиглэгдэн шалгагдаж байсан хүмүүс улс төрийн шалтгаантайгаар, мөнгөний хүчээр хэвлэл мэдээллийг ашиглаж байна. Тиймээс энэ үйлдэл бол хэрэгт нөлөөлөх гэсэн явуулга гэж үзэхээс өөр аргагүй. Талийгаачийг ажлын байрандаа мөнгө солилцож байсан гэх агуулгатай бичлэгийн асуудлыг хуулийн байгууллагад шалгаж байгаа. Олон нийтэд цацагдсан шиг агуулгатай зүйл биш” гэлээ.
Ч.Энхнамир
Сэтгэгдэл (6)