Энэ сарын 19-ний өдөр Замын-Үүд дэх гаалийн газрын гаалийн хяналтын бүсээр Монгол Улсын иргэн Б нь УАЗ-469 маркын тээврийн хэрэгсэлд 100 мянган ширхэг онцгой албан татварын тэмдэгт нууж, улсын хилээр хууль бусаар нэвтрүүлэхийг завджээ. Уг хэргийг үйлдсэн этгээд нь архины онцгой албан татварын тэмдэгтийг БНХАУ-д хуурамчаар үйлдвэрлүүлж, хилээр нэвтрүүлэх гэж байгаад ийн баригдсан байна. Хэргийг харьяалал тогтоолгон шалгуулахаар Сум дундын прокурорын газарт шилжүүлжээ.

Эх сурвалжийн өгүүлснээр дээрх тэмдэгтийг хуурамч архийг худалдаанд нийлүүлэхдээ ашиглах гэж байсан гэжээ. Мэргэжлийн байгууллагаас анхааруулж буйгаар Цагаан сар, Шинэ жил, Улсын баяр наадмаар согтууруулах ундааны хэрэглээ огцом нэмэгддэг нь хуурамч архи үйлдвэрлэгчдэд өгөөш болдог байна. Хэрвээ дээрх 100 мянган онцгой албан татварын тэмдэгтийг илрүүлээгүй бол 100 мянган хуурамч архи худалдаанд нийлүүлэгдэх эрсдэлтэй байсан юм. Тиймээс ард иргэдийг баталгаат дэлгүүрээс худалдан авалт хийхийг анхаарууллаа.

Г.Алимаа