Сүхбаатар аймагт хурдан морины үсэргээний үеэр 10 настай хүүхэд мориноос унаж амь насаа алдсан хэрэг гарсан. Тиймээс УИХ-ын гишүүн М.Оюунчимэг хурдан морины уралдаантай холбоотойгоор мориноос унан амь насаа алдаж буй хүүхдүүдийн асуудлыг УИХ-ын хэлэлцэх ёстой асуудлын эхэнд оруулах санал гаргасан юм.
Тэрбээр энэ талаар “Монгол Улс 2016 онд хүүхдийн эрхийг хамгаалах тухай хууль гаргасан. Мөн хүүхдийн эрхийг хамгаалах олон улсын конвенцид нэгдсэн байдаг. Түүнчлэн 2016 онд насанд хүрээгүй хүүхдийг ажил эрхлэхээс хориглох жагсаалтыг баталж, арваннэгдүгээр сарын 1-ээс тавдугаар сарын 1-ний өдөр хүртэлх хугацаанд хурдан морины үсэргээ, уралдаанд 12 хүртэлх насны хүүхдийг уралдуулахыг хориглосон. Гэтэл уг тогтоомж орон нутагт хэрэгжихгүй байна. Хэдхэн хоногийн өмнө Сүхбаатар аймагт морины үсэргээний үеэр 10 настай хүү амь насаа алдсан гэх мэдээллийг Хүний эрхийн комиссоос өгсөн. Уг асуудлыг чуулганы хэлэлцэх ёстой асуудлын эхэнд оруулахгүй бол өнгөрсөн онд ч амь насаа алдсан, эрүүл мэндээрээ хохирсон асуудал хэд хэдэн удаа гарсан. Мөн удахгүй Дүнжингарав тэмцээн болох сураг дуулдаж байна. Өнөөдөр 10 настай хүүхэд морины ажил хийж байгаад амь насаа алдсан тухай мэдээллийг Сүхбаатар аймгаас өгсөн. Морины ажил гэж юу яриад байгаа юм. Тиймээс Хүний эрхийн үндэсний комиссын дарга Ж.Бямбадоржид хандан албан бичиг хүргүүлээ. Удахгүй хариуг ирүүлнэ гэсэн. Цаашид уг асуудлыг Засгийн газрын түвшинд чуулганаар хөндөх болно” гэв.
Б.Лхам
Сэтгэгдэл (2)