Нийслэлийн залуучуудын хөгжлийн газраас нэг сая төгрөгөөс дээш цалинтай 500 ажлын байр зарлажээ.

Тодруулбал, Нийслэлийн залуучуудын хөгжлийн газар БНСУ-ын Койка олон улсын байгууллагын санхжүүжилттэй “Эм Кэй Ай Тинг” сургалтын төвтэй хамтран БНСУ-аас мэдээллийн технологийн салбарт мэргэшсэн залуучуудад гадаадаас аутсорсинг захиалга авч гүйцэтгэл хийх 500 залууст нэг сая төгрөгөөс дээш цалинтай ажлын байрыг санал болгож байна. Ингэхдээ мэдээлэл технологийн аутсорсингийн ажлын захиалга гүйцэтгэх, программ хангамжийн чиглэлээр гурваас дээш жил ажилласан туршлагатай мэргэжилтэнг сонгон шалгаруулах юм байна.

Харин уг чиглэлээр ойлголтгүй бол  “Эм Кэй Ай Тинг” сургалтын төвд үнэ төлбөргүй хамрагдах боломжтой бөгөөд тус хугацаанд сард 440 мянган төгрөгийн тэтгэлэг олгох аж. Энэ талаар “Эм Кэй Ай Ти” сургалтын төвийн гүйцэтгэх захирал Ш.Төгсбаяр “Мэдээллийн технологийн чиглэлээр мэргэшээгүй боловч тухайн чиглэлээр хөдөлмөр эрхлэх сонирхолтой залуучуудыг  “Эм Кэй Ай Ти” сургалтын төвд  дөрвөн сарын үнэ төлбөргүй сурган хөгжүүлж, амжилттай төгссөн залуучуудыг инкубатор төвөөр дамжуулан ажлын байранд холбон өгөх боломжтой. Тогтвортой ажлын байран дахь цалин нэг сая төгрөгөөс эхлэх бөгөөд цаашид авах цалингийн хэмжээ тухайн хүний ур чадвараас хамаарч нэмэгдэнэ. Мөн залуучууд нийлж, чадвартай баг бүрдүүлж чадвал  БНСУ-аас аутсорсинг захиалгаа өөрсдөө олдог болдог юм” гэв.

“Эм Кэй Ай Тинг” сургалтын төвд 2017 оноос хойш нийт 1800 орчим залуус хамрагдсан бөгөөд 120 гаруй залуусыг ажлын байранд зуучилжээ.

Ч.Энхнамир