Хуульч, өмгөөлөгч Ц.Монгол Зөрчлийн тухай хуулиар сэтгүүлчдэд торгууль ногдуулж байгаа хэдий ч байгаль орчныг хохироосон томоохон эрүүгийн гэмт хэргүүдийг зөрчилд тооцож, ял завшуулж байгаа асуудлаар мэдээлэл хийлээ.

Тэрбээр “Зөрчлийн тухай хуулиар 200 орчим сэтгүүлч, хэвлэл мэдээллийн байгууллагыг торгосон байна. Энэ байдал Зөрчлийн тухай хууль цагдаагийн байгууллагын төсвийн орлогыг бүрдүүлдэг томоохон эс үүсвэр болсныг харуулж байна. Зөрчлийн тухай хуулиар гарсан асуудлыг цагдаа биш харин улсын байцаагч шалгах үүрэгтэй байдаг. Энэ хуулийн долдугаар зүйлийн 11.2.3-т зааснаар талбайгаас хэтэрч гарсан тохиолдолд хэтэрсэн метр бүрээр мөн торгууль ногдуулах журамтай.

Гэвч энэ журмыг зөрчиж буй хэд хэдэн тодорхой жишээ бий. Тодруулбал, Дундговь аймгийн Өлзийт сумын нутаг дэвсгэр дээр 1.6 га талбайд 40 метр гүнд үйл ажиллагаа явуулахаар ил уурхайн зөвшөөрөл авсан аж ахуйн нэгж байгууллага зөвшөөрөл авсан газраасаа 500 метр даван үйл ажиллагаа явуулж байхад хэн ч анхаарал хандуулахгүй байна. Үүнээс болж байгаль орчны нөхөн сэргээлт хийх боломжгүй болсон. Энэ асуудлаар Байгаль орчны яаманд хандахад яамнаас энэ асуудлыг хувийн шинжээчид өгч, дүгнэлт гаргуулна гэсэн тайлбарласан. Ийм байдлаар сүйдсэн олон арван газрын нөхөн сэргээлтийг хийлгэж, хариуцлага хүлээлгэж чадахгүй байна.

Мөн Дундговь аймаг дахь уул уурхайн үйл ажиллагаа явуулж байгаа газрын асуудлыг цагдаагийн байгууллагаас дөрвөн жилийн хугацаанд шалгаж байна. Гэвч цагдаа, шүүхийн өндөр албан тушаалтай хүмүүс оролцон хэргийн харьяаллыг дөрвөн удаа сольсон асуудал гарсан.

Хуулийн шатны шүүхээр энэ асуудлыг оруулан, шүүхийн шийдвэрээр гэмт хэрэг үйлдсэн байна гэж гарч, ял оногдуулж дээд шүүхэд очсон. Гэвч Дээд шүүхэд очсоноор шүүгч нь зөрчил эсвэл гэмт хэрэг гэдгийг ялгаж шийдээгүй гэдэг шалтгаанаар буцаасан. Гэх мэтчилэн ийм төрлийн олон зөрчлийн асуудал олон гарч байгаа хэдий ч шийдвэрлэж анхаарал хандуулахгүй байна.

Мөн аж ахуйн нэгжүүд байгаль орчинд их хэмжээний хохирол учруулж байхад гэмт хэрэг бус зөрчил хэмээн тооцож, бага хэмжээний торгууль ногдуулж байгаа нь буруу” гэлээ.

Г.Эрдэнэ