Ээлжит бус чуулган маргаашнаас үргэлжүүлэн хуралдах товтой. Үүгээр Үндсэн хуульд нэмэлт, өөрчлөлт оруулах төслийн хоёр дахь хэлэлцүүлгийг хийж эхлэх юм. Энэ үеэр Ерөнхийлөгч Х.Баттулга чуулганы нэгдсэн хуралдаанд оролцож, Үндсэн хуульд нэмэлт өөрчлөлт оруулах хуулийн төслийн хоёр дахь хэлэлцүүлгийн үеэр өөрийн саналаа илэрхийлэх юм. Тэгвэл УИХ-ын босго давсан Үндсэн хуульд нэмэлт, өөрчлөлт оруулах хуулийн төслийг Төрийн тэргүүний зүгээс дэмжиж байгаа бололтой.
Тодруулбал, өнгөрсөн өдрүүдэд Хүй долоон худагт соёолонгийн уралдаан үзэх үеэрээ Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх болон УИХ-ын гишүүд Үндсэн хуулийн хэлэлцүүлэг хийсэн байна. Энэ үеэр Ерөнхийлөгч, Ерөнхий сайд нар Үндсэн хуулийн нэмэлт, өөрчлөлтийг дэмжиж байгаагаа үг хэлэх үеэрээ илэрхийлжээ.
Нэг үгээр Хүй долоон худагт ээлжит бусаар "хуралдсан" Үндэсний аюулгүй байдлын зөвлөлийн уулзалтын үеэр Ерөнхийлөгч Х.Баттулга, Ерөнхий сайд У.Хүрэлсүх нар Үндсэн хуулийн нэмэлт, өөрчлөлтийг дэмжиж байгаагаа илэрхийлсэн хэрэг.
Үндэсний Их баяр наадмыг нээж үг хэлэх үеэрээ “Наадмын дараанаас 1992 онд тунхагласан Ардчилсан Үндсэн хуулийнхаа амжилт ололтыг ахиулж, алдаа дутагдлыг засах түүхэн хариуцлагатай цаг үе тохионо. Монгол Улсын тусгаар тогтнол, бүрэн эрхт байдлын баталгаа, оршин тогтнохуйн эх үндэс болсон Үндсэн хуульд нэмэлт, өөрчлөлт оруулах ажилд иргэн бүр ирээдүйнхээ төлөө анхаарал хариуцлагатай хандаж, идэвх оролцоогоо хангах нь юу юунаас чухал болохыг нийт ард иргэддээ зарлан сонордуулъя” гэдгийг Ерөнхийлөгч Х.Баттулга илэрхийлсэн.
Харин УИХ-ын дарга Г.Занданшатар “Баяр наадмын өмнөхөн бид Монгол Улсын Үндсэн хуульд нэмэлт, өөрчлөлт оруулах Монгол орон, монгол түмний хөгжил дэвшлийн ирээдүйн хувь заяатай онцгой хамааралтай үйл хэргийг эхлүүлсэн. Наадмын дараа ч энэ ажил үйлс үргэлжилнэ.
Ардчилсан засаглалтай, тусгаар улсын иргэд эдлэх ёстой эрх чөлөөгөө бүрэн эдлэх учиртай. Шударга ёс дэлгэрч, зөвхөн хууль засагладаг байх нь монгол хүн бүрийн хүсэмжлэл боллоо. Төрийн тогтолцоо зөв, тэнцвэртэй байх нь засаглал тогтвортой, иргэндээ ээлтэй байхын эх сурвалж мөн. Цөөнх баяжиж, олонхи болсон ард түмэн ядуурах учиргүй. Эх орны минь баялаг иргэн бүхэндээ тэгш хүртэх ёстой.
Эдгээр гарцаагүй шаардлага, эрмэлзэл тэмүүллийг эш үндэс болгож, Үндсэн хуулийн шинэчлэлийг хийхээр зорьсон юм. Бурууг засах, зөвийг зорих цаг ирснийг нийт монголчууд ойлгон дэмжиж байгаад баяртай, зорьсон үйлсийнхээ үр дүнд итгэлтэй байна. Түүхэн энэ боломжийг алдаж асгалгүйгээр болохгүй байгаагаа цэгцлэх цаг нэгэнт ирсэн. Цэгцэлж хэрвээ чадвал цэгцрэх хөдөлгөөн Монголыг сайн сайханд хүргэнэ. Цэгцэлж чадах, цэгцэрч урагшлах эвийн хүч, мэргэн ухаан монголчуудад маань бий” гэсэн билээ.
С.Сүлд