Баянгол дүүргийн удирдлагууд хууль бусаар томилогдсон талаар тус дүүргийн иргэдийн төлөөлөл мэдээлэл хийлээ.

Тэдний зүгээс хууль бусаар томилогдсон дарга “Эрүүл дүүрэг” хөтөлбөрийг хэрэгжүүлэх ямар ч мэдлэг, чадваргүй гэдгийг хэлж байв. Энэ талаар УИХ-ын гишүүн асан С.Одонтуяа “Наадмын өмнөх өдөр Ө.Батжаргал даргыг нийслэл дээр дуудан нийслэлийн бүх шагналыг гардуулан өгсөн байдаг. Танайх ийм шагнал авлаа, та ийм шагнал авлаа. Бэлгийн замын халдварт өвчнөөс сайн сэргийлж чадсанаараа Баянгол дүүрэг нэгдүгээрт орлоо гэх мэтээр шагналыг манай дүүрэгт өгсөн. Харин маргааш нь хууль бусаар ажлаас халсан юм.

Хоёрдугаарт, эрүүл мэндийн салбараас гадна боловсролын салбарыг самарч эхэллээ. Тодруулбал, Баянгол дүүргийн Боловсролын хэлтсийн дарга Л.Жаргалыг хууль бусаар ажил үүргээс нь чөлөөлж, оронд нь уг албан тушаалд огт тэнцэхээргүй хүнийг ажилд томилсон. Томилохдоо хууль зөрчиж томилсон байдаг. Учир нь Төрийн албаны тухай хуульд “Тухайн албан хаагч шүүхээр маргаанаа эцэслэн шийдвэрлэтэл орны хүнийг томилохыг хориглоно” гээсн заалтыг зөрчсөн. Уг нь Баянгол дүүрэг боловсролын хувьд сургуулийн хамрагдалт 100 хувьд хүрсэн, мөн үйл ажиллагаа, төсөл хөтөлбөрөөрөө үргэлж манлайлж байдаг дүүрэг шүү дээ.

Мөн нийслэлийн Аудитын газраас Баянгол дүүргийн Боловсролын хэлтэст хийсэн шалгалтаар  ямар нэгэн зөрчилгүй гэж дүгнэгдэж байсан. Өөрөөр хэлбэл, тус хэлтсийн даргыг ажлаас халах үндэслэлгүй гэсэн үг. Тиймээс бид хууль, хяналтын байгууллагад шалгуулахаар хандсан.

Зарим гишүүд улстөржиж болно. Гэхдээ хууль зөрчих ёсгүй. Боловсрол, Эрүүл мэндийн салбар гэдэг хамгийн чухал. Тийм учраас агуулгыг нь бодож ажиллах ёстой. Өнөөдөр Монгол Улс элэгний хорт хадвраар нас баралт, Ходоодны хорт хавдрын нас баралтаар нэгдүгээрт орчихлоо. Мөн умайн хүзүүний хорт хавдраар тавдугаарт орсон байна. Дэлхийд ийм байдалтай байхад манай дүүргийн эрүүл мэндийн салбар хорт хавдрын эсрэг өдөр шөнөгүй ажилладаг юм. Гэвч энэ салбарыг улстөржүүлж байгаад туйлын харамсалтай байна” гэв.

Б.Лхам