УИХ-ын дарга Г.Занданшатар орон нутагт ажиллаж, Үндсэн хуульд нэмэлт, өөрчлөлтийн хуулийн төслийг иргэдэд танилцуулж байна. Энэ хүрээнд Баянхонгор аймгийн Баянговь суманд ажилласан бөгөөд улсын төсвийн хөрөнгөөр хийгдэж буй бүтээн байгуулалтын ажлуудын явц байдалтай танилцжээ. Тус суманд нутгийн удирдлагын ордон болон 75 хүүхдийн багтаамжтай цэцэрлэгийн барилгын ажил хийгдэж байгаа юм байна.

Нутгийн удирдлагын ордныг “Очир заан” ХХК хариуцан гүйцэтгэж байгаа бөгөөд сумын 32 иргэнийг авч ажиллуулж байна. Барилгыг ажил хэвийн үргэлжилж байгаа учраас энэ оны арванхоёрдугаар сарын 1-н гэхэд улсын комисст хүлээлгэн өгнө гэдгийг тус компанийн инженер н.Лхагва танилцуулсан байна. Харин “Арвин Хонгор” ХХК-ийн хариуцан ажиллаж буй 75 хүүхдийн багтаамжтай цэцэрлэгийн барилгын ажил 70 орчим хувьтай явагдаж байгаад УИХ-ын дарга шүүмжлэлтэй ханджээ.

Тэрбээр “Зуны сар зургаа биш. Наймдугаар сар гарчихсан байхад барилгын ажил дөнгөж 70 хувьтай байна. Удахгүй хичээл сургууль эхлэх гэж байна. Энэ сарын 15-н гэхэд хүлээлгэж өгөх хэрэгтэй.

Хүүхдийн төлөө хийж байгаа ажилд сэтгэлтэй баймаар байна” гээд аймгийн холбогдох байгууллага, албан тушаалтнуудад аймгийн хэмжээнд хийгдэж буй бүх бүтээн байгуулалтын ажлын явцад хяналт тавьж, заасан хугацаанд ашиглалтадоруулах тал дээр анхаарч ажиллах үүрэг, чиглэлийг өглөө.

Түүнчлэн Улаанбаатар хотоос эхо оношилгоо, хүүхэд, эмэгтэйчүүд, гэмтэл, урологи, шүд зэрэг нарийн мэргэжлийн эмч нарын баг хөдөө орон нутгийн иргэдэд эрүүл мэндийн тусламж үйлчилгээг үзүүлсэн юм. Аймгийн хэмжээнд бүх насныхны дунд шүдний өвчлөл их байгааг эмч нарын багийн ахлагч, “Хонгор дент” шүдний эмнэлгийн их эмч Б.Нацагдорж хэлж байлаа.

Аймгийн удирдагуудаас “Эрүүл шүд” аяныг өрнүүлж, зарим сумдад хүүхдийн шүдний өвчлөлийг огцом бууруулсан ч эцэг эхчүүдийн хайхрамжгүй байдлаас болж эргээд өвчлөл нэмэгдэх хандлага байгаа учир онцгой анхаарах шаардлагатай гэлээ. Орон нутгийн газрын болон ундны усны онцлогоос шалтгаалан иргэдийн дунд дотор эрхтэнийн өвчлөл багагүй байдаг байна. Баянговь суманд давхардсан тоогоор 150 гаруй иргэн эмнэлгийн тусламж, үйлчилгээнд хамрагдсан юм. Малчин иргэд тэр бүр эрүүл мэнддээ анхаарч чаддаггүй тул дахин нарийн мэргэжлийн эмч нарын багийг удаан хугацаагаар сумдад ажиллуулж өгөхийг УИХ-ын дарга болон орон нутгийн удирдлагуудаас хүслээ.

Г.Алимаа