УИХ-ын гишүүн О.Баасанхүү Улсын ерөнхий прокурор, АТГ-ын удирдлагуудад ЖДҮ-гийн хэрэгт холбогдсон нэр бүхий УИХ-ын гишүүдэд холбогдох хэргийн шалгалт ямар шатанд үргэлжил байгааг тодруулахаар албан тоот явуулсан билээ. Тэгвэл түүний албан тоотын хариу ирсэн талаар мэдээлэл өглөө.
Тэрбээр "Хариу бичигт 114 хэрэг нээж, мөрдөн шалгах ажиллагаа явуулсан талаар бичсэн байна лээ. Тэр дундаа 2016 оноос өмнөх асуудлыг ЦЕГ, 2016 оноос хойшихыг АТГ-ЦЕГ-ын хамтарсан ажлын хэсэг шалгаж байгаа гэснийг дурдсан байсан. Шалгаж үзэхэд 38.2 тэрбум төгрөгийн санхүүжилтыг зориулалтын бусаар зарцуулсан байна. Хуурамч төсөл шалгаруулсан гэсэн үг. Зориулалтын бусаар зарцуулсан 38.2 тэрбум төгрөгөөс 3.3 тэрбумыг нь мөрдөн байцаалтын явцад нөхөн төлүүлж, 20 аж ахуйн нэгжийн дансыг битүүмжилсэн байна.
Үүнээс 2.3 тэрбум төгрөгийн зарцуулалт нь огт тодорхойгүй, алга болсон байна.
Түүнчлэн зээл авсан жагсаалт дунд хадгаламж зээлийн хоршоо, банк бус санхүүгийн байгууллага, ломбардтай 34 аж ахуйн нэгж байна. Тэдний 11 нь албан тушаалтантай хамаарал бүхий гэдэг нь УИХ-ын гишүүдтэй хамаарал бүхий гэсэн үг. Эндээс бага хүүтэй зээл аваад өндөр хүүтэй хадгаламжид мөнгө оруулсан найман үйлдэл тогтоогдсон гэсэн. Б.Батзоригийг үлдээгээд бусад 48 гишүүний хэргийг тусгаарласан байна. Хөөн хэлэлцэх хугацааг нь дуустал хүлээнэ гэсэн үг. Сонгуулийн өмнө ЖДҮ-г шийдсэн хэмээн Б.Батзоригийг золиосонд гаргах болов уу. Б.Батзоригийг долдугаар сарын 26-нд нийслэлийн прокурорт өгөөд шалгуулж байгаа юм байна.
Г.Алимаа