Энэ долоо хоногт Тээврийн цагдаагийн албаны нийт 1218 дуудлагыг хүлээн авснаас зам тээврийн ослын шинжтэй 769 дуудлага, мэдээллийг шийдвэрлэжээ.
Бүртгэдсэн осол хэргийн улмаас нийслэлд 25 хүн гэмтэж, ноцтой зам тээврийн ослын улмаас нийслэлд гурав, орон нутагт 11 хүний амь нас хохирсон байна.
Тухайлбал, энэ сарын 05-ны өдрийн 13.10 цагийн орчим Toyota Camry маркийн автомашин онхолдож жолооч 39 настай, эрэгтэй Л амиа алджээ.
Мөн өдрийн 14.30 цагийн орчим Булган аймгийн Рашаант сумын IV баг “Бөргөцөгийн ар” гэх газар Toyota Prius автомашины жолооч Ц нь Toyota Harrier Б жолоочтой автомашинтай мөргөлдөж жолооч 57 настай эмэгтэй Ц, зорчигч 69 настай эрэгтэй Т, 47 настай эмэгтэй Ө нарын гурван хүн нас барж жолооч Б, зорчигч Ч нарын хоёр хүн гэмтсэн тохиолдол бүртгэгджээ.
Түүнчлэн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 149 жолоочийг илрүүлэн, эрхгүй үедээ согтуугаар тээврийн хэрэгсэл жолоодсон 21 хүнийг шүүхээр баривчилж хуулийн дагуу хариуцлага тооцсон байна.
Энэ 7 хоногт бүртгэгдсэн зам тээврийн осол, хэргийг өмнөх 7 хоногийн нөхцөл байдалтай харьцуулахад нийт дуудлага мэдээлэл 26.2 хувиар, зам тээврийн ослын шинжтэй дуудлага 20.7 хувиар, гэмтсэн хүний тоо 13.6 хувиар, зам тээврийн ослын улмаас нас барсан хүний тоо дөрөв дахин өссөн байна.
Эх сурвалж: ТЦА
Сэтгэгдэл (1)