Японы гэрэл зурагчин Сүгияама Тэрүзо Монгол Улсад анх 1983 онд ирж байсан бөгөөд тэр цагаас өнөөг хүртэлх 36 жилийн өөрчлөлтийг гэрэл зургийн хальснаа мөнхлөн үлдээсэн гэрэл зургийн номын нээлт өнөөдөр боллоо.
Монгол-Японы төвд болсон "Улаанбаатар -1983" гэрэл зургийн номын нээлтийн үеэр тэрбээр “Намайг анх Монголд ирж байхад социалист засаглалтайн миний өмнө огт үзэж байгаагүйгээр нам гүм нийслэл угтсан. Тухайн үеийн тогтолцооноос болоод тэр үү, гэрэл зураг авахад хараа хяналт ихтэй байсан. Ялангуяа түүхэн соёлын өвийн зургийг авах тэр бүр болмож байгаагүй. Харин 1984 онд ЮНЕСКО-ийн дэмжлэгтэйгээр Монголын урлагийн нийгэмлэгийн даргатай хамтарч, соёлын өвийн зураг авалтын ажлыг эхлүүлсэн. Би ингэж л Монголын түүхийг хальсанд буулгах боломжийг атгасан хүн. Удалгүй “Монголын соёлын өв” дөрвөн цуврал гэрэл зургийн цомог хэвлэсэн. Ингэснээр дэлхийд анхны Монголын гэрэл зургийн томоохон бүтээл болж, өндрөөр үнэлэгдэж байлаа” гэсэн юм.
Гэрэл зурагчин Сүгияама Тэрүзогийн үзэсгэлэнд соёлын үнэт өв болон социалист засаглалтай үеийн Улаанбаатар хот, ардчилалд шилжсэний дараах Улаанбаатар хот, монголчуудын амьдрал, уламжлал, хувцаслалт зэрэг 36 жилийн түүхийг гэрчилсэн 223 зураг багтжээ.
Ташрамд дурдахад Сүгияама Тэрүзо нь
“ВАСЭДА- 100 жил” гэрэл зургийн цомог 1976 он
“МОНГОЛ ЗУРАГ”/Монголын шашны зураг/ 1987 он
“МОНГОЛЫН ДҮРСЛЭХ УРЛАГ” 1988 он
“МОНГОЛЫН СҮМ ХИЙД БОЛОН АРХИТЕКТУР” 1990 он
“МОНГОЛ УРАН БАРИМАЛ” /Монголын цутгамал бурхад/ 1990 он
“Монголын нууц эрдэнэс” гэрэл зургийн цомог 1996 он
“Монголын шашны урлаг” гэрэл зургийн цомог 1998 он зэрэг гэрэл зургийн цомог гаргаж байсан бол 2007 онд Монгол Улсын Ерөнхийлөгчийн зарлигаар Төрийн дээд шагнал “Алтан гадас” одонгоор шагнагдаж байжээ.
