МАН-ын гишүүн асан, Монгол Улсаас Турк улсын Стамбул хотод суух ерөнхий консулаар ажиллаж байсан Э.Мөнх-Очирыг Ерөнхийлөгч Х.Баттулгын орон тооны зөвлөхөөр томилжээ. Түүний хувьд Баянзүрх дүүргийн Засаг дарга, Улаанбаатар хотын ерөнхий менежерээр ажиллаж байгаад МАН-аас нэр дэвшиж УИХ-ын гишүүнээр ажиллаж байсан туршлагатай нэгэн.
Улмаар 2013 оны Ерөнхийлөгчийн сонгуулиар намынхаа эсрэг ажилласан гэх шүүмжлэлийг дагуулж байсан түүнийг Ц.Элбэгдорж Төрийн тэргүүнээр улиран сонгогдсоныхоо дараа Стамбул хотод суух ерөнхий консулаар томилж байв.
Сүүлд Стамбул хот дахь Консулын газрын дэд консул Б.Баттүшиг түүний жолооч С.Эрдэнэбаяр нар хар тамхины хэрэгт холбогдоход "Монголын ард түмнээсээ уучлалт гуймаар байна. Миний хувьд өнгөрсөн гуравдугаар сарын 28-ны өдрийн Засгийн газрын тогтоолоор дуудагдсан. Дөрөвдүгээр сарын 3-нд ирсэн. Түүнээс хойш юу болсон талаар би мэдэхгүй байна. Ажлаа өгсөн бол Консулын газартай эргэж холбогдоод байдаггүй” гэсэн тайлбарыг өгч байсан билээ.
Ямартай ч, Стамбул хотын ерөнхий консулын албан тушаалаас буусан Э.Мөнх-Очир төрөлх намаасаа буур сэлгэж, Ерөнхийлөгч Х.Баттулгад ийнхүү зөвлөхөөр болж байна. Түүний аавыг нийслэлийн Засаг дарга, УИХ-ын даргаар ажиллаж байсан төр, нийгмийн зүтгэлтэн Л.Энэбиш агсан гэдгийг улс төр, нийгмийн хүрээнд танина.
Энэбишийн Мөнх-Очир
Боловсрол:
1988 он Нийслэлийн 23-р дунд сургууль
1991-1993 он Бүгд Найрамдах Турк Улсын Анкара хотын Их сургууль-Турк хэл
1996-1998 он Зах зээл судлалын хүрээлэн-Гадаад худалдааны менежер
1999 он Үндэсний Техникийн Их Сургууль-Эдийн засагч
2001 он Боловсролын хүрээлэн-Магистр
Ажлын туршлага:
1994-1996 он Залуучууд, спорт, урлагийн хорооны дэргэдэх Соёлын төвд Видео клубын эрхлэгч
1995-1997 он Монгол, Туркийн хамтарсан “Эмир” ХХК-д Ерөнхий менежер
1997-2001 он “Хоргодоо шарга” ХХК-ийн Ерөнхий захирал
2002 он Нийслэлийн Баянзүрх дүүргийн Засаг дарга
2003-2004 он Улаанбаатар хотын Захирагчийн ажлын албанд Аялал жуулчлалын хэлтсийн дарга
2004-2007 он Нийслэлийн Баянзүрх дүүргийн Засаг дарга
2007-2008 он Улаанбаатар хотын Ерөнхий менежер бөгөөд Захирагчийн ажлын албаны дарга
2008-2012 он Монгол Улсын Их Хурлын гишүүн
2013-2019 он Монгол Улсаас Бүгд Найрамдах Турк Улсын Стамбул хотод суух Ерөнхий Консул
С.Сүлд
Сэтгэгдэл (40)