БНХАУ-ын Ухань хотод гарсан шинэ төрлийн корона вирусийн халдвар тус улсыг төдийгүй дэлхий нийтийг бүхэлд нь түгшүүрт автуулсан энэ долоо хоног шувтрах тийшээ хандаж байна. ДЭМБ-аас сүүлийн хоёр хоногийн турш БНХАУ болон бусад оронд үүссэн нөхцөл байдлыг харгалзан үзсэний эцэст 2009 онд гахайн ханиад, 2014 онд Полио вирус, 2016 онд Зика вирус, 2014, 2019 онд Эбола вирусийн дэгдэлтийн үеэр авч байсан арга хэмжээний адил олон улсын хэмжээнд онц байдал зарлалаа.

Дэлхийн хэмжээнд одоогийн байдлаар /2020 оны нэгдүгээр сарын 31-ний/ коронавирусийн халдварын 9692 орчим тохиолдол бүртгэгдэж, уг өвчний улмаас 213 хүн нас баржээ.

Үүнтэй холбогдуулж, эдийн засаг, худалдаа наймаа, аялал жуулчлалын томоохон бүс нутаг болсон БНХАУ-д халдварын голомтоос АНУ, Япон, Франц, БНСУ тэргүүтэй улс орон иргэдээ эх оронд татах хүсэлтийг тус улсын Засгийн газарт уламжилж, түрүүчээсээ тусгай үүргийн онгоцыг тийш явуулж байна. Ухань хотод суралцаж буй Монголын 31 оюутнаа татах Засгийн газрын шийдвэрийг Хятадын тал хүлээж авсны дагуу МИАТ компанийн зүгээс тусгай үүргийн онгоцыг бэлтгэж, өчигдөр шөнө халдварын голомтыг зорьж, эх оронд нь авчирлаа. Сайн мэдээ, бахархмаар үйл явдал.

Засгийн газар, Гадаад харилцааны яамны төвшинд хэд хоногийн турш Хятадын талд удаа дараа хүсэлт тавьсан нь ийнхүү биеллээ оллоо.

Г.Баатарцогт даргатай, Б.Батманлай, Т.Эрдэнэ-Очир нарын нисгэгч бүхий бусад албаныхнаас бүрдсэн 737-800 онгоцны багийнхан Ухань газардаж, тэнд сурч, амьдарч байгаа 31 оюутныг эх оронд нь авчрах үүргийг хүлээсэн нь энэ. Хачирхалтай нь, энэхүү үйл явдлыг үгүйсгэж, тэднийг чичлэх хандлага өнгөрсөн өдрүүдэд ямар их явах, ялангуяа сошиал орчинд. “Халдварын голомтод байгаа оюутнуудыг авчирч яах юм” л гэнэ. “Түүгээр явсан гайг үүгээр дуудлаа” л гэв. Бүр сүүлдээ “Тэнд нь үлдээгээд, халдварын тархалт намжсаны дараа эх оронд ирүүлэх байсан юм. Ямар ч хэрэггүй юманд татвар төлөгчдийн мөнгийг үргүй хоосон зарцуулж байна” гэсэн хандлага давамгайлах шинжтэй. Юу гэсэн үг вэ?!.

“Дайраад ирэхэд далай шиг. Буцаад ирэхэд булаг шиг” гэдэггүй бил үү? Эвсэл монгол түмний өв уламлжлал ингэтгээ хар бараанаар будагдаж, бусдыгаа үгүйсгэж, чичлэхийн цондон болчихсон гэж үү?

Цаашлаад сошиал орчин хэмээх хийсвэр ертөнцийн хэрэглээ, тэнд цаг тутамд хөвөрдөг эзэн биегүй стресс биднийг хөтөлсөөр хэдийнэ хана хэрэм босгочихсон хэрэг үү?. Үгүй ээ!. Эзэн нь юмаа мэдэж, эрэг нь усаа хашдаг гэдэг шиг Ухань хотоос 31 оюутнаа авчрахаар болсон Засгийн газрын шийдвэрийн хүрээнд БНХАУ-ыг зориод онгоцны багийн бүрэлдэхүүнд харин ч баярлаж, тэднээр бахархах ёстой. Хүнд хэцүү үед иргэнийхээ үүргийг биелүүлж, сайн дурын үндсэнд, аюулт өвчний голомт руу монгол иргэдээ авчрахаар явсан тэд бол энх цагийн баатрууд. Ухань хотоос авчирсан Монгол иргэдийн асуудал тэгтлээ сандарч, болгоомжлоод байх асуудал ч биш. Ном журмынх нь дагуу 14 хоног тусгаарлаад, холбогдох арга хэмжээг нь авах л асуудал.

Тэнд 30 байтугай гурав, бүр нэг иргэн байсан ч авчрах нь энэ бидний төрийн үүрэг. Эрх биш Монгол Улс төртэй, засагтай, тусгаар улсын хувьд авч, хэрэгжүүлэх л арга хэмжээ. Тэндээс ирсэн Монголын иргэд бидний л адил аавтэй, ээжтэй, ахтай, дүүтэй, үнэрлэх үртэй, өр зүрхэндээ тээж явдаг эх оронтой. Цөөхөн монголчуудын нэгээхэн хэсэг. Ажил, амьдралын шаардлага, бусдын болон өөрийн эрхээр харь улсыг зорьсон ч эцсийн дүндээ эх орон, элгэн садан нь тэдний сэтгэлд үргэлж хадаатай явдаг юм. Тиймээс одоо тайвширцгаа. Тэд эх орондоо ирлээ. Эх орноо гэсэн сэтгэл рүү нь битгий ус цац! 

Эцэст хэлэхэд, Ухань хотоос эх орондоо ирсэн монголчуудаас гадна сэтгэл түгшин хүлээж байсан тэдний эцэг, эх, гэр бүлийнхэн нь нэг хоног ч гэсэн бүтэн нойртой, сэтгэл амар хонохоор болсон нь чухал. Юу сайхан энэ л сайхан.

С.Гандөл