НМХГ, НЭМГ-аас сайжруулсан шахмал түлштэй холбоотой асуудлаар мэдээлэл хийлээ.
НМХГ-ын дэд дарга С.Даваасүрэн “Өнгөрсөн шөнийн байдлаар найман хорооны найман өрхөд хордлогын дуудлага ирж, шуурхай арга хэмжээ авч ажилласан. Голчлон хөнгөн хэлбэрийн хордлого гэсэн мэдээллийг холбогдох байгууллагаас өгсөн. Баянзүрх дүүргийн иргэнээс шөнийн 02.00 цагийн үед мэдрэгч нь дугарах үед гэрээ агаар сэлгэлт хийгээд мэдрэгчээ салгаад унтсан байна. Улмаар өглөө сэрэхэд хүүхдүүд нь бөөлжиж, эхнэрийнх нь толгой нь өвдсөн байдалтай байжээ. Тиймээс мэдрэгч дугарсан л бол агаар сэлгэлт хийсэн бол цаашид үргэлжлүүлэн зөвлөгөөний дагуу шаардлагатай зүйлсийг хийх нь зөв. Утаа гарч байгаа зүйлтэйгээ ноцолдохоос биш мэдрэгчээ битгий унтраагаач ээ.
Агаарын бохирдлыг бууруулах гэж байгаа ажил нь хүний эрүүл мэнд, амь настай холбоотой асуудал. Гэтэл түүхий нүүрс оруулж ирэх асуудал буурахгүй байна. Тухайлбал, хэд хоногийн өмнө 10 гаруй тонн түүхий нүүрсийг элсээр далдалж Хонхороор оруулж ирэхийг завдлаа. Өөрөө бол бизнес хийж байна гэж хэлээд байгаа. Гэтэл нийслэлчүүдийн эрүүл мэндэд хор учруулж байгаагаа ойлгохгүй байна” гэлээ.
Түүнчлэн ДЭМБ-аас шинэ төрлийн коронавирусын нийгмийн эрүүл мэндийн ноцтой байдал гэж зарласан. Тэгвэл тус энэ сарын 2-ны 20.00 цагийн мэдээллээр уг халдвараар өвчилсан хүний 14411, нас барсан хүний тоо 304 байна. Тархалтын хувьд БНХАУ-ын 30 муж, Сингапур, АНУ, Япон, БНСУ, Вьетнам, Франц, Канад, Авчтрали, Малайз, Герман, Шри Ланк, Камбож, Арабын нэгдсэн Эмират, Финлянд, Филиппин, Энэтхэг, Итали, ОХУ, Швед, Их Британи зэрэг нийт 26 улсад уг өвчний тохиолдол бүртгэгджээ. Сэжигтэй тохиолдлын 19544, хүнд байдалтай байгаа хүний тоо 2110, ажиглалтад байгаа хүний тоо 137.594, бүрэн эдгэрсэн хүний тоо 327 болжээ.
Улсын хэмжээнд шинэ төрлийн коронавирус бүртгэгдээгүй бөгөөд халдвар гарсан бүс нутагт зорчсон, халуурсан, ханиалгасан гэсэн өгүүлэмжтэй 109 хүнд тандалт судалгаа явуулж, 40 хүнд илрээгүй. Харин 13 хүнд А хүрээний H3N2гэсэн томуугийн вирус илэрсэн байна.
Мөн Ухань хотод сурч байсан Монгол иргэдийг авчрахаар явсан албаныхныг тусгаарлан тандалт, судалгаа хийж байна гэлээ.
Б.Лхам
