Ерөнхий сайд У.Хүрэлсүх цаг үеийн асуудлаар мэдээлэл хийлээ.

Тэрбээр “Ерөнхий сайдын ивээл дор зохион байгуулагдах үндэсний өв соёл, түүх заншлыг бүтээсэн шилдэг хэвлэл мэдээллийн хэрэгсэл шалгаруулах уралдаан зарлаж байна. Уралдааны гол зорилго нь удахгүй Монгол үндэстний цагаан сар болох гэж байна. Хэдийгээр нийтээрээ өргөн дэлгэр тэмдэглэхгүй ч үндэсний өв соёл, түүхийг бэлгэдсэн бүтээлийг нэмэгдүүлэх, хүүхэд залууст үндэсний бахархлыг бий болгох цаашид өргөн нэвтрүүлгийн хөтөлбөрийг дэмжих, төрөөс дэмжлэг үзүүлэх зайлшгүй шаардлага байна. Тиймээс иргэдээ соён гэгээрүүлэх ажлыг хийх нь зүйтэй.

Сүүлийн 30 жил бид уул уурхай ярилаа. Гэхдээ үүний хажуугаар урлаг соёл, үндэсний түүх соёл, хүний ёсны талаар ярилгүй орхигдуулсан байна. Монголоороо сэтгэж, хайрладаг байх ёстой. Тиймээс соёнгэгээрүүлэх асуудал чухал байна. Сар шинийн өдрүүдэд зориулан долоо хоног уг ажил үргэлжлэх юм.  Ингээд та бүхнийг энэ ажилд уриалж байна.

Бид хэдийгээр ардчилсан орон боловч Монгол хүн бий болгох зайлшгүй шаардлага байна. Засгийн газар урлаг соёлд ихээхэн анхаарч байгааг та бүхэн харж байгаа. Удахгүй Чингис хаан музей баригдана. Мөн соёл, урлаг, спортоор үр хойчоо соён гэгээрүүлнэ. Эх орноо гэсэн сэтгэл, зүрхтэй иргэнийг бий болгох ёстой. Үр хүүхдийнхээ хүмүүжилд анхаарах хэрэгтэй байна. Бид өөрийн гэсэн зан заншил, үүх түүхтэй ард түмэн гэдгээ мартаж болохгүй. Тиймээс хэвлэл мэдээллүүдтэйгээ цаашид хамтарч ажиллана” гэлээ.

Б.Лхам