Шинэ төрлийн коронавирусийн талаар Эрүүл мэндийн яамнаас мэдээлэл хийлээ.

Мэдээллийн эхэнд шинэ төрлийн коронавирусын халдвараас урьдчилан сэргийлэх ажилд иргэн, аж ахуйн нэгж идэвхтэй оролцож байгааг онцолсон юм. Тодруулбал, Польш улсад амьдарч байгаа иргэдээс 400 мянган маск, эмч эмнэлгийн мэргэжилтнүүдэд зориулсан 100 ширхэг хамгаалалт хандивлажээ. Мөн “Монос” группээс Ухань хотоос ирсэн оюутнуудыг витаминжуулах аянд оролцсон байна. Түүнчлэн УИХ-ын гишүүн О.Батнасан 13 мянган ширхэг маск Эрүүл мэндийн яаманд хандивласан байна.

ДЭМБ-ын мэргэжилтэн О.Ариунтуяа “Дэлхийн хэмжээнд халдварын тоо нэмэгдсэн хэвээр байна. Өнөөдрийн байдлаар 17900 тохиолдол бүртгэгдэж, нас баралт 45-аар нэмэгдсэн байдалтай байна. Харин өчигдөр дөрвөн улсад халдварын тохиолдол бүртгэгдсэн. Тухайлбал, ОХУ-д хоёр, Швед, Испани нэг, Их Британид хоёр тохиолдол бүртгэгдсэн бөгөөд нэмж халдвар тархсан улс орон бүртгэгдээгүй. БНХАУ-аас гадна нас баралтын анхны тохиолдол нь Филиппин улсад мэдээлэгдсэн бөгөөд анхны тохиолдлоос халдвар авсан талаар мэдээлсэн. Мөн эрүүл мэндийн ажилтан халдвар авсан анхны тохиолдол Франц улсад гарсан. Энэ нь эмнэлгийн халдвар хамгааллын дэглэм, нөөцийг зөв бүрдүүлэх шаардлагатай байгааг харуулж байгаа юм. 

Эрүүл мэндийн яамнаас сүүлийн 14 хоногийн хугацаанд голомттой бүсэд аялсан тохиолдолд аль болох гэрээсээ гарахгүй байхыг анхааруулж байгаа. Хэрэв шинж тэмдэг мэдэгдвэл эмнэлгийн байгууллагад хандах хэрэгтэй. Вирус хурдацтай тархаж байгаа энэ үед мөн адил үндэслэлгүй мэдээлэл ихээр тархаж байна. Тиймээс ДЭМБ-аас үндэслэлгүй мэдээллийг шүүж, ташаа мэдээлэлд тайлбар өгч байгаа. Манай улс ч мөн уг мэдээллийг шүүж, эргэлзээтэй мэдээлэлд хариу өгч ажиллаж байна. Монгол Улс халдвар бүртгэгдээгүй 34 хоногтоо явж байна. Энэ нь олон салбарын хамтын ажиллагаа юм. Цаашил энэ хоногийн нэг хоног ч гэсэн сунгаж, бэлэн байдалд ажиллах нь чухал юм” гэлээ.

ХӨСҮТ-ийн захирал Д.Нямхүү “ХӨСҮТ-д Ухань хотоос энэ сарын 1-нд 30 оюутан, нэг хүүхдийг хүлээн авч хяналт тавин ажиллаж байна. Оюутнуудын биеийн байдал сайн байна. Коронавирусын шинжилгээ авахад бүгд сөрөг гарсан. Цаашид биеийн байдлыг хянаж, эмчийн үзлэгт байнга хяналт тавьж ажиллана. Ингээд дүрэм ёсоор 14 хоног ажиглалтад байлгана. Мөн онгоцоор зөөсөн 15 иргэнийг хяналтад авсан.

Мөн энэ сарын 1-нд Дорноговь аймгийн Замын-Үүд боомтоор Эрээн хотод амьдардаг гэр бүлийн гурван хүнийг сэжигтэй тохиолдол гэж үзсэн тул тухайн газарт нь тусгаарласан. Хавьталд таван хүнийг ажиглалтад авсан. Вирусын шинжилгээ нь сөрөг гарсан” гэв.

Б.Лхам