Шинэ төрлийн коронавирусын халдварын талаар Эрүүл мэндийн яамнаас ээлжит мэдээлэл хийлээ.
ДЭМБ-ын мэргэжилтэн О.Ариунтуяа “Өнөөдрийн байдлаар манай улсад халдварын тохиолдол бүртгэгдээгүй. Дэлхийн хэмжээнд 2830 тохиолдол бүртгэгдэж, нас баралтын хэмжээ 57-оор нэмэгдсэн байна. Нэмж халдвар авсан улс орон илрээгүй. Шинээр бүртгэгдсэн тохиолдол нь БНХАУ руу зорчсон иргэд байна. ДЭМБ-аас анхны тохиолдол болон тэдгээрийн хавьтлыг судлах удирдамж гаргалаа. Мөн ханиах, найтаах зэрэг шинж тэмдгийн үед тухайн хүнтэй нэг метрийн зайтай байх нь амьсгалын замын халдвар авах өндөр эрсдэлтэйд тооцогддог юм” гэв.
Гадаад харилцааны яамны Консулын газрын захирал Л.Мөнхтүшиг “Хилийн чанадад байгаа монгол иргэдийн эрх ашгийг хамгаалах талаар арга хэмжээ авч ажиллаж байна. Зөвхөн БНХАУ-д суугаа Элчин сайдлын яамтай харьцахаас гадна бүхий л Элчин сайдын яамдуудтай харьцах иргэдэд мэдээлэл түгээн ажиллаж байна. Өнөөдрийн байдлаар голомтын бүсэд хамаарахгүй нутгаас эх орондоо ирэх хүсэлтэй иргэдэд дэмжлэг үзүүлэх чиглэлээр шуурхай байна. Өнөөдрийн байдлаар БНХАУ-ын Эрээн хотоос 150 Монгол иргэн буцах хүсэлтээ өгсөн байна. Үүнийг шийдвэрлэхээр ажиллаж байна. Цаашид хятадад байгаа иргэдээ эх оронд нь ирүүлэх талаар арга хэмжээ авч байна. Мөн гадаадад байгаа иргэд монголынхоо элчин сайдын яамдаа бүртгүүлж, аливаа мэдээ мэдээллийг авч байгаарай” хэмээн уриалав.
МХЕГ-ын Эрүүл ахуй халдвар хамгааллын хяналтын улсын ахлах байцаагч Т.Төмөрбаатар “Халдвар тархсан хугацаанд бүх боомтуудаар нийт 64 сэжигтэй тохиолдол илэрсэн. Үүний дийлэнх нь Буянт-Ухаа боомт дээр гарсан. Одоогийн байдлаар хилийн таван боомт хаагдсан байна. Мөн манай улс энэ сарын 5-ны өдрийг хүртэл зөвшөөрөгдсөн боомтуудаар иргэдээ татаж авч байна. Гэхдээ иргэдийг хилээр нэвтрүүлэхдээ Эрүүл мэндийн яам зэрэг бусад холбогдох байгууллагуудтай хамтран ажиллаж хяналт, шалгалт үзлэгийг тогтмол хийн ажиллаж байна. Түүнчлэн хилээр мах махан бүтээгдэхүүн, далайн гаралтай, голомттой бүсээс орж ирж байгаа бүтээгдэхүүн оруулахгүй байхыг анхааруулж байна. Хилийн боомтуудад ариутгал, халдваргүйжүүлэлтийг чангатган ажиллаж байна” гэлээ.
А.Сүх
