Бусдыг хясан боогдуулах замаар тэрбум гаруй төгрөгийн хахууль авсан ч хөөн хэлэлцэх хугацаа дууссан гэдэг үндэслэлээр нэхр бүхий хүмүүст холбогдох хэрэг шүүхээс мултраад байсан. Тодруулбал, МХЕГ-ын хэлтсийн даргаар ажиллаж байсан Н.Баярсайхан, Э.Аззаяа нар бусдыг хясан боогдуулж, онц их хэмжээний авлига авч байгаад үйлдэл дээрээ баригдсан билээ. Хэргийг АТГ-аас шалгаж, шүүхэд шилжүүлсэний дагуу Чингэлтэй дүүргийн Эрүүгийн хэргийн анхан шатны шүүхийн өнгөрсөн 2019 оны тавдугаар сарын 07-ны өдөр хуралдсан юм. Гэвч хэргийн хөөн хэлэлцэх хугацаа дууссан гэдэг үндэслэлээр хэрэгсэхгүй болгох шийдвэрийг гаргасан нь олон нийтийн шүүмжлэлийг дагуулсан билээ.

Тэгвэл Улсын Дээд шүүхийн Эрүүгийн хэргийн танхим уг хэрэгт холбогдсон нэр бүхий 19 хүнд холбогдох  хэргийг өнөөдөр хянахаар товложээ.

Хэргийг нэхэн сануулбал, уг хэргийн талаарх бичлэгийг АТГ-аас өнгөрсөн 2019 оны долдугаар сард олон нийтэд ил болгосон. Шалгалтын үеэр гэрээс нь болон орон байр, албан өрөө, биеэс нь нийт 1.0 тэрбум орчим төгрөгийг бэлнээр хурааж авсан байна. Тодруулбал, МХЕГ-ын Экспорт, импортын хилийн хорио цээрийн газрын хэлтсийн дарга Н.Баярсайханыг шалгах явцад гэрээс нь 230.8 сая төгрөг, 152,177 ам.доллар, 77,000 юанийг тус тус бэлнээр хураан авч баримтжуулсан юм. 

АТГ-ын мөрдөгчид Э.Аззаяагийн өмчлөлийн Хан-Уул дүүргийн 15-р хорооны Рапид хотхоны орон сууцанд нэгжлэг хийх явцдаа 57.4 сая төгрөг, 20,000 юань, МХЕГ-ын хэлтсийн дарга Н.Баярсайханы гэрт нэгжлэг хийхэд зочны өрөөнөөс 16,460 ам.доллар, 5 сая таөгрөг, унтлагын өрөөнөөс 17.5 сая төгрөг, гэрт байлах сейфнээс 127,117 ам.доллар, 140 сая төгрөг, албаны өрөөнөөс 8,600 ам.доллар, 10 сая төгрөгийг хураан авсан байна.

Мөрдөн шалгах ажиллагааны хүрээнд МХЕГ-ын албан тушаалтнууд болох Э.Аззаяа, Н.Баярсайхан, Б.Элдэв-Очир, С.Бүрэнтөгс, Ш.Тэгвандан нар Монгол Улсын хилээр хүнсний бүтээгдэхүүн экспортлох, импортлох зөвшөөрөл олгох чиг үүргээ биелүүлэхдээ түргэн муудах болон хүнсний бүтээгдэхүүн экспортлох, импортлох зөвшөөрөл хүссэн ААН-үүдийн зөвшөөрлийг олгохгүй удаах, хясан боогдуулах аргаар ийнхүү нэг тэрбум орчим төгрөгийг хахуульд авсан нь тогтоогджээ. Иймд Н.Баярсайханыг 2019 оны тавдугаар сарын 7-ны өдрийн Чингэлтэй дүүргийн Эрүүгийн хэргийн анхан шатны шүүхийн 363 дугаар шийтгэх тогтоолоор нийтийн албанд томилогдох эрхийг таван жилийн хугацаагаар хасаж, дөчин мянган нэгж буюу 40 сая төгрөгөөр торгох ялаар, мөн Э.Аззаяа, Т.Элдэв-Очир, С.Бүрэнтөгс нарт холбогдох Эрүүгийн хуулийн тусгай ангийн 18.6 дугаар зүйлийн 1 дэх хэсэгт заасан гэмт хэргийн хөөн хэлэлцэх хугацаа дууссан үндэслэлээр хэргийг хэрэгсэхгүй болгосон байна.

Шүүхийн уг шийдвэрийн дараа прокурорын эсэргүүцэл бичсэн юм. Үүний дагуу Нийслэлийн Эрүүгийн хэргийн давж заалдах шатны шүүх өнгөрсөн 2019 оны есдүгээр сарын 10-ны өдөр хуралдаж, анхан шатны шүүхийн шийдвэрийг хүчингүй болгож байсан бөгөөд энэ дагуу Улсын Дээд шүүх хуралдахаар товлосон байна.

Г.Эрдэнэ