Зам, тээврийн хөгжлийн яамны байранд нэгнийхээ амь насыг хохироосон хэрэг 2018 оны наймдугаар сард гарсан билээ. Тодруулбал, тус яамны Хяналт шинжилгээ, үнэлгээ, дотоод аудитын газрын дарга Т.Гомбосүрэнг хэлстийн дарга Б.Махбал зодсоны улмаас амь насанд нь хүрсэн байдаг. Хэргийг жил гаруйн хугацаанд шалгасан ч өнөөдрийг хүртэл холбогдох шийдвэрийг гаргаагүй байгаа юм.
Сүүлд өнгөрсөн оны арванхоёрдугаар сард болсон шүүх хурлаас хэргийг мөрдөн байцаалтад буцаасан билээ. Нийслэлийн прокурорын газраас Б.Махбалд Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.1 дэх хэсэг буюу хүнийг онц хэрцгийгээр амь насыг нь хөнөөсөн гэх зүйлчлэлээр яллах дүгнэлт үйлдэж, хэргийг шүүхэд шилжүүлээд байсан юм.
Хуульд заасны дагуу Б.Махбалд холбогдох хүн амины хэргийг нэг жил зургаан сарын хугацаанд шүүхээр дэнсэлж, ял шийтгэл оногдуулж чадаагүй учраас Эрүүгийн хэрэг хянан шийдвэрлэх тухай хуулийн 14.10 дугаар зүйлийн 14.10.2-т заасныг баримтлан түүнийг ийнхүү суллахаар болж байгаа гэнэ.
Уг заалтад “Хэргийн ээдрээ төвөгтэй байдлыг харгалзан яллагдагчийг цаашид цагдан хорих зайлшгүй шаардлагатай бол шүүх цагдан хорих таслан сэргийлэх арга хэмжээний хугацааг тухай бүр 1 сар хүртэл хугацаагаар сунгах ба яллагдагчийг цагдан хорих нийт хугацаа Эрүүгийн хуульд хорих ялын дээд хэмжээг 5 жил хүртэл хугацаагаар оногдуулахаар заасан гэмт хэрэгт 12 сар, Эрүүгийн хуульд хорих ялын дээд хэмжээг 5 жилээс дээш хугацаагаар оногдуулахаар заасан гэмт хэрэгт 18 сараас хэтэрч болохгүй” хэмээн заасан байдаг. Тэгэхээр ирэх ням гаригт буюу хоёрдугаар сарын 8-ны өдөр суллах бололтой.
Түүнийг саатуулж, шалгаж эхэлснээс хойш өнөөдрийг хүртэл хугацаанд хуульд заасан 18 сарын хугацаа хэдийнэ дуусгавар болоод байгаа юм.
С.Сүлд
Сэтгэгдэл (14)