"Эрдэнэт үйлдвэр" ТӨҮГ-ын Үйлдвэрчний эвлэлийн холбооноос цаг үеийн асуудлаар өнөөдөр мэдээлэл хийлээ.

Тодруулбал, хоёрдугаар сарын 3-ны өдөр ШИНЭ намын зөвлөл "Эрдэнэт" үйлдвэр ТӨҮГ-ын Үйлдвэрчний эвлэлийн холбоо үйл ажиллагаагаа явуулдаггүй, ажиллагсад нь хөдөлмөрийн дарамтад байгаа мэтээр худал тайлбар хийсэнд гүнээ харамсаж байна. Ийм нотолгоогүй ташаа, мэдээлэл зарим нэг улс төрийн хүчин, улстөрчдөөс гаргаж буй тул зөв мэдээллийг ард түмэнд хүргэхийг хүссэн гэдгээ Үйлдвэрчний эвлэлийн хорооны дарга Б.Төгсбаяр онцоллоо. Иймд "Эрдэнэт" үйлдвэр ТӨҮГ-ын ҮЭХ-оос ШИНЭ намын дарга, УИХ-ын гишүүн Ж.Батзанданд мэдэгдэл хүргүүлж байгаа аж.

Тэрбээр “Түүхэн хугацаандаа "Эрдэнэт үйлдвэр"-ийн Үйлдвэрчний эвлэлийн холбоо "Эрдэнэт" үйлдвэрийн захиргаатай 12 удаагийн хамтын гэрээ хийж, үйлдвэрийн ажилчдынхаа эрх ашгийг төлөөлөн хамгаалсан. Сүүлд хийсэн хамтын гэрээ маань энэ оны нэгдүгээр сарын 1-нээс хүчин төгөлдөр мөрдөгдөөд явж байгаа ба нийт 12 бүлэг 108 заалтаас бүрддэг.  Орон нутгийн засаг захиргаа, улсын бүртгэлд бүртгэгдсэн хүчин төгөлдөр мөрдөгдөж байгаа гэрээг маань байхгүй ажил хийгээгүй мэтээр тайлбарлаж болохгүй. Бид энэ хамтын ажиллагааны гэрээгээрээ дамжуулан олон ажлыг хийж байгаа. Тухайлбал, 2017 онд ажилчдынхаа цалинг 10, 2018 онд 15 хүртэлх, 2019 оны тав, аравдугаар сард тус тус 10 хувиар гээд сүүлийн гурван жилийн хугацаанд гэхэд нийт 45 хувиар бид ажилчдынхаа цалинг нэмэгдүүлсэн. Шинэ хамтын гэрээгээр энэ оны тавдугаар сараас цалингаа дахиад 20 хувиар нэмэгдүүлэх гэж байна. Өмнөх хамтын гэрээ маань 102.6 хувийн биелэлтэй хэрэгжиж, дүгнэгдсэн ба одоо шинэ гэрээ хэрэгжиж байгааг дахин хэлье” гэлээ.

Мөн сонгуулийн жил дөхөөд ирэхээр улстөрчид "Эрдэнэт” үйлдвэрийг онилдгийг бүгд мэдэж байгаа. Жишээ нь, 2015 оны сүүлээр Ерөнхийлөгчийн зөвлөх байсан Батчимэг гэх хүн "13 дахь сарын цалинг би өгүүлсэн" гээд ярьж байсан. Оны дараа О.Баасанхүү гишүүн 13 дахь сарын цалин нь огт өгөгддөггүй болохоор өгүүлэх гэж байна гэх мэтээр ярьсан. Тийм зүйл гэж байхгүй. Энэ 13 дахь сарын цалин бидний хамтын гэрээний 3.17 дугаар заалтаар зохицуулагдсан харилцаа. Үүнийг үйлдвэрийн захирал, ҮЭХ-ны дарга, тэр тусмаа аль нэг нам, улстөрч өгчихдөггүй юм. Энэхүү улстөржсөн ажлуудаа "Эрдэнэт үйлдвэр"-ээс холдуулаач. Урмыг нь хугалахаар ууцыг нь хугал гэдэг, мөрөөрөө ажлаа хийж яваа үйлдвэрийн ажилчдыг тайван орхихыг гуйж байна” гэдгийг онцолсон юм.

С.Сүлд