Шинэ төрлийн коронавирусийн дэгдэлтээс сэргийлэх үүднээс Монгол Улсад хөл хорио тогтоож, ЕБС, цэцэрлэгийн үйл ажиллагааг түр зогсоосон билээ. Гэвч хорио цээрийн үеэр Дархан-Уул аймгийн Дархан сумын V  цэцэрлэгийн үйлчлэгч Зулааг цэцэрлэгийн эрхлэгч нь ажилдаа яаралтай ир гэж дуудаж, ирүүлснээс болж, харгалзах хүнгүй гэртээ үлдсэн 1-5 насны гурван хүүхэд амь насаа алджээ.

Тодруулбал, талийгаач хүүхдүүдийн ээж Зулаа нь түрээсийн байранд амьдардаг бөгөөд ажилдаа явах хойгуур нь угаалтуурын хэсэг бөглөрсөнөөс болж, халуун ус алдаж, түүнд уртасгагч залгуураар дамжсан цахилгаанд цохиулж 5 настай эмэгтэй Я, 4 настай эмэгтэй А, 1 нас 6 сартай эмэгтэй Ц нарын гурван хүүхэд амиа алдсан хэмээн ОБЕГ-аас мэдээллээ.

Харин уг асуудлаар Монголын багш нарын Үйлдвэрчний эвлэлийн холбооны гишүүн Ц.Мөнхтуяа "Паар дэлбэрсний улмаас хүүхдүүд амиа алдаж, ээж нь гүн шоконд орсон байна. Дархан-Уул аймгийн V цэцэрлэгийн эрхлэгч Дэлгэрсайхан хорио цээрийн үеэр 50 жилийн ой тэмдэглэнэ гэж багш, үйлчлэгч нарыг ажлын байранд нь дуудан ирүүлж, дарамталснаас болж гурвын гурван нялх хүүхэд амьдаараа түлэгдэж, нас барлаа.

Энэ асуудлаар салбар яаманд хандана. Үнэхээр аймшигтай хэрэг боллоо. Тус үйлчлэгч багш цэцэрлэг рүү дуудагдаж явахдаа гурван хүүхдээ гэртээ цоожилж явсанаас болж хүүхдүүд нь амь насаа алдаад байна. Байгууллага удирдаж байгаа хүмүүс хүнээ бодооч ээ. Хүнээс илүү зүйл байхгүй биз дээ. Залуухан ээж ажлын байрны дарамтнаас болж гурван хүүхдээ алдчихлаа. Үнэхээр харамсаж байна. Манай холбооны хувьд багш, ажилчдынхаа эрхийг хамгаалахаар олон удаа шаардлага хүргүүлж байсан. Гэтэл хорио цээрийн үеэр ийм хэрэг гарчихлаа. Сэтгэл урагдаж байна. Даана ч дээ" гэлээ. 

Харин багш Мөнхбаатар "Сургууль, цэцэрлэгийн эрхлэгч нар сайдын тушаалыг биелүүлэхгүй байна. Үүнээс болж гурван хүүхэд амиа алдлаа. Хэн хариуцлага хүлээх бэ. Цэцэрлэгийн эрхлэгчийг дуудсан цагт ирэхгүй бол ажлаасаа халагдана гэж айсандаа л гурван хүүхдээ гэртээ орхиод гарсан байж таарна. Түүнээс биш дуртайдаа хүүхдүүдээ орхиж явах ээж байх уу. Ой тэмдэглэх тийм чухал юм уу. Хүн чухал биз дээ. Энэ мэдээллийг битгий тараа гэж багш нарт үүрэг өгсөн байна" гэлээ.