Хотын дарга IV төрөх эмнэлгийн царцсан барилгыг яаравчлах талаар газар дээр нь очиж танилцлаа. Энэ үеэр сэтгүүлчдийн асуултад хариулт өглөө.
-Улсын IV төрөх эмнэлгийн барилгын ажил удаашралтай байна. Барилгын ажлыг гүйцээхэд ямар боломж бололцоо байна вэ?
-Нийслэлд хүүхдийн төдийгүй эмчилгээ оношилгоо, үйлчилгээний чанар хүртээмж ямар хэмжээнд байгааг бид мэдэж байгаа. Мөн нийслэлийн ажил үйлчилгээний зарим ажил удаашралтай байна. Үүний жишээ нь IV төрөх эмнэлэг юм. 2018 оны дөрөвдүгээр сард эхэлж, барилгын ажил өнгөрсөн онд ашиглалтад орох ёстой байсан. Гэвч төсөв мөнгөнөөс шалтгаалан барилгын ажил удаашралтай байна. Тус компани Үндэсний хөгжлийн банктай хийсэн гэрээний дагуу үүргээ биелүүлчихсэн юм байна. Ийм барилгыг ийм хэмжээнд бариулчхаад захиалагчийн эрх үүргийг биелүүлэхгүй яваад байж болохгүй. Тиймээс Ерөнхий сайдад өөрийн биеэр танилцуулна. Засгийн газраар хэлэлцүүлж, ойрын хугацаанд шийдвэрлэх арга хэмжээ авна. Төсвийн хөрөнгө болдоггүй юм бол өөр ямар эх үүсвэр байж болох бүхий л талаас нь авч үзнэ. Бид хэрэгтэй хэрэггүй зүйлд мөнгө зарцуулаад байдаги хэрнээ төрөх эмнэлгээ хойш тавьж, барилгыг удаашруулж болохгүй. Барилгыг оны эхний хоёрдугаар улиралд багтааж оруулна.
-Төсөв батлагдахаас өмнө энэ асуудлыг тавьж болоогүй юм уу?
-2020 оны төсөвт 8 тэрбум төгрөг суусан. Хүчилтөрөгчийн шугам сүлжээ, аппарат хэрэгсэл зэрэг дэд бүтцийн асуудал шийдвэрлэхэд зайлшгүй нэмэлт хөрөнгө шаардлагатай байгаа учраас компани үйл ажиллагаагаа явуулж чадахгүй зогссон юм байна.
-Коронавирусын халдвартай холбогдуулан тусгай эмнэлэг барих талаар яригдаж байна. Эмнэлгийг хэдий хугацаанд барих боломжтой вэ?
-Халдварын тархалт дэгдэлт анхаарал татахуйц, хүн бүр эрсдэлээс урьдчилан сэргийлэх шаардлагатай байна. Дэлхий нийтэд эрсдэлийг бууруулах талаар онцгой статустайгаар тусгай объект ашиглаж эхэлж байна. Манай улсын хувьд эрсдэл өндөр байгаа учраас хотын зах руу 200-300 онцгой тохиолдолд ашиглах эмнэлэг бий болгохоос өөр аргагүй. Хамгийн сайнаар төсвөө хангаж байж, бэлтгэлээ хийх хэрэгтэй. Ойрын хугацаанд барих ёстой гэж бодож байна. Нийслэлээс онцгой анхаарч ажиллана.
Б.Лхам
