Нийтийн тээврийн шинэчлэлийн талаар Нийслэлийн нийтийн тээврийн үйлчилгээний газрын Тээврийн төлөвлөлт, технологийн хэлтсийн дарга С.Цэцэгмаагаас тодрууллаа.

-Өнгөрсөн нэгдүгээр сарын 20-ноос эхлэн монгол инженерүүдийн бүтээсэн эко туршилтын автобус үйлчилгээнд явж эхэлсэн. Үйл ажиллагаа нь хэзээ жигдрэх вэ?

-Ирэх гуравдугаар сард үйл ажиллагаа нь жигдэрнэ гэсэн. Одоогоор цахилгаан автобус цэнэгээ хэр хадгалж байна зэрэг бусад зүйлсийг нь туршиж байгаа юм билээ. Зорчигч тээврийн хөдөлгөөнөөс инженерүүд нь бүртгэл, судалгааг нь хийж байгаа. Нийтийн тээврийн зүгээс зам нь өгсүүр, уруу биш чиглэлд туршилтаар оруулсан. Хоёр чиглэлд, дөрвөн автобус явж байгаа. Миний ажигласнаар цахилгаан автобус өвлийн улиралд цэнэг их иддэг, дулааны улиралд тохиромжтой юм шиг санагдсан. Удахгүй судалгаа нь гарахаар мэдэгдэх байх.

-Энэ онд хэчнээн автобус насжилтаар хасагдах вэ?

-Дансны тээврийн хэрэгслийн тоогоор 135 гэж гарсан. Эдгээр тээврийн хэрэгсэл нь энэ оны арванхоёрдугаар сарын 31-нд ашиглалтаас гарна. Нийтийн тээврийн стандарт шаардлага нь 12 жил үйлчилгээнд явахаар заагдсан байдаг учраас хуулийн дагуу оны төгсгөлд ашиглалтаас гарна.

-Парк шинэчлэлийн хүрээнд хэчнээн автобус нэмэгдэх юм бэ?

-Нийслэлийн төсөвт нийтийн тээврийн парк шинэчлэлд 300 автобус шинээр авахаар тусгуулсан. Эдгээр автобус хэзээ орж ирэх нь тодорхойгүй байна. Ямартай ч эхний ээлжид дөрвөн автобус туршилтаар орж ирлээ. Бидний зүгээс нийтийн тээвэр хүртээмж муутай байгаа учраас автобус авъя гэдэг хүсэлтээ төсөвт тусгуулсан.

-Нийслэлийн агаарын бохирдлыг бууруулах ажлын хүрээнд нийтийн тээвэрт утаа шүүгч суурилуулж байгаа. Уг ажил ямар хувьтай явж байна вэ?

-Утаа шүүгч эхний ээлжид 20 автобусанд суурилуулсан. Удахгүй 400 автобусанд суурилуулахаар хуваарь нь гараад байна. Уг ажлыг БОАЖЯ-аас зохион байгуулж байгаа бөгөөд тодорхой тэмдэглэгээ харьцуулалтыг хийх байх. Мөн Нийтийн тээврийн газраас утаа шүүгч суурилуулснаар нийтийн тээврээс гарах утаа хэчнээн хувиар буурч байгаа талаар хэмжилт, судалгаа хийж байна. Нэгдсэн дүн одоогоор гараагүй байгаа учраас тодорхой мэдээлэл өгөх боломжгүй байна.

-Сурагчдын автобусны тоог хичээлийн хоёрдугаар улирлаас нэмнэ гэж нийслэлээс хэлж байсан. Сурагчдын автобусны тоо нэмэгдэж байгаа юу?

-Одоогоор нэмэгдэж байгаа зүйл байхгүй. Учир нь нийтийн тээврийн үйлчилгээ эрхлэгч аж ахуйн нэгж, байгууллагууд хүчээр шахам автобус гарган сурагчдыг зөөвөрлөдөг юм. Түүнээс биш нийслэлээс гаргаж өгсөн автобус байхгүй. Аж ахуйн нэгжүүд нийгмийн хариуцлагынхаа хүрээнд үйлчилгээнд явдаг.

-Тэгэхээр шатахуун тос зэрэг зардлаа тухайн аж ахуйн нэгжүүд хувиасаа гаргадаг гэсэн үг үү?

-Нийслэлээс шатахуун болон жолоочийн цалинг өгдөг. Тухайн аж ахуйн нэгж ашгийн төлөө байгууллага учраас ерөнхийдөө хасах орлогоор шийдэж өгч байгаа.

Б.Лхам