Гаалийн ерөнхий газраас коронавирусний халдвараас сэргийлэх ажлын талаар мэдээлэл хийлээ.

Гаалийн ерөнхий газрын Статистикийн хэлстийн дарга Б.Цэрэн “Энэ оны нэгдүгээр сарын байдлаар экспорт, импортын хэмжээ буурсан байна. Тодруулбал, нэгдүгээр сард 459 сая ам.долларын экспорт хийсэн нь өмнөх оны мөн үеэс 24 хувиар буурсан. Мөн экспортын хэмжээ 6 хувиар буурсан байна. Манай улсын хувьд экспортын 95 хувийг БНХАУ, импортын 60 хувийг БНХАУ, 40 хувийг ОХУ эзэлдэг. Мөн амны хаалтын импорт нэмэгдэж байна. Тухайлбал, нэгдүгээр сард 500 мянган амны хаалт хилээр орж ирсэн бол энэ сард 1.944.000 мянган амны хаалт орж ирээд байна. Мөн ариутгал цэвэрлэгээний бодис хоёр дахин нэмэгдсэн” гэлээ.

Гаалийн ерөнхий газрын Гаалийн зөрчилтэй тэмцэх хэрэг бүртгэлийн газрын Хар тамхины хяналтын албаны дарга Б.Сүхбаатар “Өнгөрсөн нэгдүгээр сард гаалийн байгууллагын хэмжээнд 79 зөрчил илрүүлэн шийдвэрлэжээ. Үүнээс харьяаллын дагуу 10-ийг шилжүүлж, эрүүгийн гэмт хэргийн шинжтэй таван зөрчлийг илрүүлсэн. Гарч байгаа зөрчлийн дийлэнх нь гаалийн хууль тогтоомж зөрчсөн, татвараас зайлсхийсэн зэрэг зөрчлүүд байна. Эдгээр зөрчилд нийт 65.7 сая төгрөгийн торгууль ногдуулсан. Жишээлбэл, Монгол Улсын иргэн өнгөрсөн нэгдүгээр сарын 29-нд Буянт-Ухаа дахь хилийн боомтоор БНСУ-г зорьж ирэх үедээ БНСУ-ын 50 сая вон мэдүүлэлгүй орж ирснийг илрүүлэн, шалгаж байна. Мөн хар тамхи, мансууруулах бодис илрүүлэх хүчин чадалтай шууд болон зайнаас тандан мэдэх боломжтой төхөөрөмж сууриулуулж эхлээд байна. Тухайлбал, 2018 онд хар тамхи, мансууруулах бодисын 15 удаагийн үйлдлийг таслан зогсоосон. Эдгээрт холбогдох 200 гаруй грамм бодис хурааж шилжүүлсэн. Харин он гарсаар улсын хилээр нэвтрүүлэхийг завдсан асуупдал бүртгэгдээгүй байна. Хар тамхи, мансууруулах бодистой холбоотой хяналт, шалгалтыг чангаруулсан бөгөөд нярайн тоглоомд хийж орж ирэх зэрэг тохиолдол өмнө нь бүртгэгдэж байсан юм. Тиймээс иргэд хувийн эд зүйл ачаа тээшээ хараа хяналтгүй орхихгүй байхыг анхааруулж байна” гэв.

Б.Лхам