ОХУ-ын "Аэрофлот"-оор энэ сарын 2-нд ирсэн, Дорноговь аймгийн Улаанбадрах суманд байх "Бадрах энержи" компанид ажилладаг Францын иргэнээс коронавирусний халдвар тохиолдол илрээд байна. Үүнтэй холбогдуулж онгоц, зочид буудал, гал тэрэг зэрэгт нэгдүгээр хавьтал болсон хүмүүсийг тусгаарлаж, дам хавьтсаныг олж тогтоогоод байгаа юм. Монголд ажилладаг Францын 57 настай иргэн харьж, 10 гаруй хоноод гуравдугаар сарын 2-нд ирсэн байдаг.

Ирсэн даруйд нь өөрийгөө 14 хоног тусгаарлахыг хэлсэн ч үл тоож бусад газраар явсныг албаныхан тогтоосон. Мөн шинж тэмдэг илэрснээс хойш нэгдүгээр хавьтлын хүмүүсийг цагдаа, тагнуулынхан тогтоожээ. Үүнтэй холбогдуулж, хотоос гарах, хот руу орох хот хоорондын тээвэр, хувийн автомашины хөдөлгөөнийг өнөөдрөөс энэ 16-ний даваа гарагийн 07.00 цаг хүртэл хориглоод байна. Мөн орон нутгийн нислэг, суудлын галт тэрэгний хөдөлгөөнийг энэ сарын 17-ныг хүртэл зогсоох шийдвэрийг Улсын онцгой комиссоос гаргажээ.

Бидэнд олдсон мэдээллээр Францын иргэн Монголд ирсэн эхний өдөртөө Баянгол зочид буудалд буусан бөгөөд офисс нь ICC tower-т байрлаж, тэндээ ажлаа хийж байсан аж. Мөн Төв номын сангийн урд талын KFC-ээс хоол захиалж, идээд өрөөндөө ирж амаржээ.

Бидэнд олдсон мэдээллээр түүнтэй нэг оффист ажилладаг өмгөөлөгч нь Захиргааны хэргийн шүүх хуралд зургаан удаа оролцжээ. Үүнтэй холбогдуулж, Захиргааны хэргийн шүүхэд хөл хөдөлгөөнд орж эхэлсэн байна. 

С.Сүлд