Франц улсын иргэнээс коронавирусний халдвар илэрснээс хойш дээрх иргэнийг 14 хоног тусгаарлаагүй шалтгааныг олох гэсэн иргэд цөөнгүй байсаар байна. Холбогдох албанаас өгсөн тайлбараар халдвар голомтлон гараагүй улс орноос ирсэн иргэдэд тусгаарлах арга хэмжээ аваагүй, зөвхөн өөрийгөө тусгаарлаарай гэдэг зөвлөмжийг өгөөд л явуулсан гэж буй.
Дээрх иргэний хувьд Монголоос Францад очсон хойноо гэр дэлгүүр гэсэн мартшруттайгаар 10 гаруй хоносон бол Монголд ирснээс хойш нэг хонов уу үгүй юу албан, ресторан гээд явсан газар, уулзсан хүний тоо талийж өгсөн байгаа юм.
Түүнийг Монголд ирэх үед Францад нэг тохиолдол илэрчихсэн, арга хэмжээ аваад эхэлсэн байж. Гэсэн ч тэр тоосонгүй. Тоох тоохгүйдээ бүр онгоцоор ирэхдээ хүртэл амны хаалт зүүгээгүй гэх. Түүнтэй хамт Дэлхийн эрүүл мэндийн байгууллагын нэр бүхий долон төлөөлөгч ирсэн. Тэд ч амны хаалт зүүхгүйгээр онгоцоор, ресторанаар үйлчлүүлсэн, бүр Монголд ирсэн хойноо хүртэл амны хаалт зүүхгүйгээр сургалт зохион байгуулсан. Дархан хотын эрүүл мэндийн газрынхан "Амны хаалт зүү" гэж сануулахад "Don't worry" гээд инээсэн гэх. Коронагаас айсан монголчууд хилээ хааж, нутаг нэгтнүүдээ харийн улсад хаяж байх ийм нөхцөлд шүү дээ.
Азаар ч гэх үү, ДЭМБ гэх дэлхийн хэмжээний байгууллагын төлөөлөгчдөөс халдвар илэрсэнгүй.
Тэгвэл Францын иргэнийг тусгаарлаагүй, онц байдлын зөвлөмжийг зөрчихөд нь нэр бүхий Улсын их хурлын гишүүдийн оролцоо бий гэх шуум тараад амжив.
Холбогдох албанаас өгсөн мэдээллээр ийм байх боломжгүй. Тиймээс үймээнийг далимдуулж, эрх баригч намын нэр хүндийг унагах гэсэн явуургүй санаархал байхыг үгүйсгэхгүй. Гэвч соёлтой, боловсон, ухамсартай гэх нэршилтэй Европи иргэний хэнэггүй үйлдэл өөрийнх нь шийдвэр байв уу, эсвэл үнэхээр нэр бүхий хүмүүс нөлөөлсөн болоод дүрэм журам зөрчив үү гэдэг хачирхалтай. Уг мэдээлэлтэй зэрэгцээд Франц улсаас Монголд Улсад суух Онц бөгөөд Бүрэн эрхэт Элчин сайд нь өөрийн улсын иргэний амь нас, аюулгүй байдалд санаа зовж буйгаа мэдэгдэв. Түүний эл мэдэгдэл цагаа олоогүй мэт боловч начир дээрээ иргэнээ гэсэн дипломатичийн зоригтой шийдвэр байсныг онцлох юун.
Тэрбээр ийн мэдэгдсэнээрээ өөр дээрээ гал дуудахаа мэдэж байсан, гэвч иргэнээ гэсэн сэтгэлээ нэгдүгээрт тавьсан нь бидэнд түүнээс сурах зүйл их бий гэдгийг бас л нотлон харуулсан юм.
Юутай ч Франц улсын иргэнийг ХӨСҮТ-д авчирч эмчилж эхэллээ. Хүний, өөрийн үр ялгаа юу байхав гэдэг шиг хүн л бол хүн. Түүнд хүн ёсоор хүнлэг хандах ёстой. Одоо хамгийн гол нь халдвар цааш тархаагүй байгаасай гэж залбирах л үлдлээ.
Г.Маргад
