Шинэ төрлийн коронавирус дэлхий нийтэд тархсантай холбогдуулан нэг дор олон иргэн бөөгнөрөхийг хориглосон ч гэлээ эрхээ хамгаалуулахыг хүссэн уурхайчид эсэргүүцлийн алхалтыг өчигдрөөс эхлэн зохион байгуулж байна.

Тодруулбал, “Эрдэнэс Тавантолгой” ХК-ийн ажилчид болон "Эв санааны нэгдэл" үйлдвэрчний эвлэлээс эсэргүүцлийн алхалтыг нүүрсний тээвэрлэлтийн зам дээр өчигдөр зохион байгуулсан. Үүний учир нь БНХАУ-ын хөрөнгө оруулалттай “Ти Ти Жевико” компани компанийн нууц задруулсан хэргээр арван монгол залууг ажлаас нь халсан, мөн “Эрдэнэс Тавантолгой” ХК-ийн есөн ажилтныг техник дээр гаргахгүй гэсэн шийдвэрийг гаргажээ.

Тиймээс дээрх залуусыг яаралтай ажлын байраар хангаж, хууль бусаар байгуулсан “Эрдэнэс майнинг” компанийн татан буулгах шаардлага хүргүүлж байгаа юм байна.

Жагсагчдын хувьд “Эрдэнэс Тавантолгой”-гоос ирж байгаа автомашины хөдөлгөөнийг саатуулж, зам хаан алхсан юм.

Хятадын хөрөнгө оруулалттай компанийн ажилчид уг жагсаалд нэгдэхийг хүссэн боловч мастерууд нь дургүйцэж, дарамталсан гэдгийг үйлдвэрчний эвлэлээс мөн энэ үеэр мэдэгдсэн юм. Гэвч алхалтын төгсгөлд зарим ажилчид нэгдэхээр ирсэн.

Эсэргүүцэл зарласан уурхайчдын хувьд ажил хаялт зохион байгуулаагүй бөгөөд зөвхөн ажлаас буух, очихдоо автозам хааж алхах байдлаар эсэргүүцлээ илэрхийлж байгаа юм байна.

Нийт хоёр өдөр эсэргүүцэл зарлаад тэдний шаардлагыг хүлээж авахгүй бол тэмцлийн дараагийн шатанд нэгдэх юм байна. Үйлдвэрчний эвлэлээс “Ажлын байраа алдсан 19 ажилтныг бид хамгаална. Ажилд нь эргүүлж оруулахын төлөө тэмцэхгүй бол хэдэн ч монгол хүнийг ажилгүй болгохыг бид мэдэхгүй. Тиймээс уурхайчид нэгдэх ёстой” гэдгийг энэ үеэр хэлсэн юм.

Мөн "Үйлдвэрчний эвлэл байгуулж, хөдөлмөрлөх эрхээ хангуулахыг хүссэн залуус ажлаасаа халагдаж байсан. Жишээлбэл, "Болд төмөр Ерөө гол", "Эс Жи Эс", "Алтайн хүдэр" гээд компаниуд байна. Гадаадын компаниуд Монгол Улсад үйл ажиллагаа явуулж байгаа бол хуулиа даган биелүүлж, уурхайчдын эрхийг дээдлэх ёстой" гэлээ.

Уурхайчид өчигдөр орой ажлаасаа буухдаа автозамаар зургаан эгнээ болж алхсан юм. Нийт 100 орчим уурхайчин оролцсон уг эсэргүүцлийн алхалт хоёр өдөр үргэлжлэх юм байна. Өнөөдөр өглөө дахин зохион байгуулсан эсэргүүцлийн алхалтад нийт 100 орчим уурхайчин бас нэгдсэн. Тэд өнөөдөр орой, маргааш өглөө мөн адил ийн эсэргүүцлээ илэрхийлэх бөгөөд хэрвээ ажлаасаа халагдсан иргэдийг эргүүлж авахгүй бол тэмцлийн дараагийн хэлбэрт шилжих аж. 

Г.Маргад