“Монос косметикс”, “Нахиа импекс” компанийн гар халдваргүйжүүлэх бүтээгдэхүүнийг техникийн этилийн спирт ашиглаж хийсэн талаар Мэргэжлийн хяналтын ерөнхий газраас мэдээллээ. 

МХЕГ-ын  Эрүүл мэндийн хяналтын хэлтсийн дарга Г.Баярболд "Өчигдөр УОК-ын мэдэгдлийн дараа “Монос”, “Нахиа импекс" компаниас Мэргэжлийн хяналтын байгууллага гар халдваргүйжүүлэгчийг техникийн спиртээр хийсэн гэж ард иргэдэд  буруу ташаа мэдээлэл өглөө. Үүнийг хүнсний гуравдугаар зэргийн спиртээр хийдэг гэсэн мэдэгдлийг сошиалаар гаргасан.

Гэтэл гар халдваргүйжүүлэгч нь тодорхой стандарттай. Уг стандарт тухайн бүтээгдэхүүний үндсэн түүхий эд этилийн спирт, 96 хувийн хатуулагтай, спиртээр хийгдэх ёстой. Уг этилийн спирт нь тансаг зэрэглэлийн ангилалд багтдаг спирт байна гэж стандартаар зааж өгсөн. Монгол Улсад үйлдвэрлэгдэж буй хүнсний спиртийг альфа, онцгой, дээд, тансаг гэж ангилдаг. Нэр дурдагдсан компаниас гаргасан мэдэгдэлд “гуравдугаар зэргийн хүнсний спиртээр үйлдвэрлэсэн” гэдэг нь гар халдваргүйжүүлэгч бүтээгдэхүүний стандартад заагдаагүй. 

Тухайн компаниуд техникийн этилийн спиртээр гар халдваргүйжүүлэгч бэлдмэл үйлдвэрлэж байсан нь тогтоогдсон.

 “Монос” компанид Зөрчлийн хуулиар гурван сая төгрөгийн торгууль ногдуулсан" гэлээ.