"Байгалийн түүхийн музей"-н барилгыг нурааж оронд нь "Чингис хаан" музейг байгуулах шийдвэрийг Засгийн газраас гаргасан билээ.

Энэ дагууу өнгөрсөн сард ашиглалтын хугацаа дууссан барилгыг нурааж, улмаар Ерөнхий сайд У.Хүрэлсүх захирамжаар тус “Эрдэмтдийн зөвлөл”-ийг  байгуулсан юм. Тэгвэл ШУА-ийн ерөнхийлөгч Д.Рэгдэлээр ахлуулсан “Чингис хаан” музейн эрдэмтдийн зөвлөл өчигдөр хуралдаж  Ажлын багийн танилцуулгыг хэлэлцлээ. Хурлаар “Чингис хаан” музей байгуулах ажлыг мэргэжлийн зөвлөгөөгөөр хангах үүрэг бүхий "Эрдэмтдийн зөвлөлийн үйл ажиллагааны журам”-ын төслийг хэлэлцэж баталлаа. 
“Чингис хаан” музей нь нийт 15 танхимтай байхаар төлөвлөсөн бөгөөд одоогоор 3-4, 5-6 дугаар давхруудын дэглэлтийг гаргасан байна. Тодруулбал, 3-4 дүгээр давхарт Эртний улсуудын танхим буюу Хүннү гүрэнтэй холбогдох үзмэрүүд байх бол 5-6 дугаар давхрыг Эзэнт гүрний түүхтэй холбон дэглэх аж. 

Эрдэмтдийн зөвлөлийн гишүүд “Чингис хаан” музей нь Үндэсний түүхийн музейгээс ялгарах онцлог нь юу байх, “Чингис хаан” гэсэн нэрээ бүх үзмэртэй холбон ажиллах чиглэлд анхаарахыг Ажлын багт зөвлөжээ.

Энэ үеэр Ажлын хэсгийн ахлагч Д.Рэгдэл "Бид саналаа нэгтгэж зөвлөмж хүргүүлнэ. Ерөнхий сайд У.Хүрэлсүх “Чингис хаан” музей  нь Монголын төрт ёсны түүхийн музей байх юм шүү. Төрт ёсны түүхээ үзээд монгол хүн бахархаж байх ёстой гэж хэлсэн. Тиймээс бид төрт ёсны түүх, дэлхийн хүн төрөлхтний хөгжил дэвшилд монголчууд ямар хувь нэмэр оруулсан юм гэдгийг энэ музейн гол чиг шугам болгох учиртай. Зөвлөлийн гишүүдээс гарсан бас нэг чухал санал бол Чингис хаан гэдэг нэрээ үзмэрийн сан бүрдүүлэхдээ онцгой анхаарах" гэсэн байна.

Тус музейн барилга бол том биш, зай талбай багатай. Тиймээс  орчин үеийн технологи голчлон ашиглах аж. Виртуаль байдлаар 3D, 5D хэмжээгээр тухайн цаг үед очсон мэт сэтгэгдэл төрүүлэх дэлгэцүүдийг бэлдэх, таван хэлээр тайлбараа хийдэг байх зэргээр зөвлөлдөж байгаа аж.