УИХ-ын гишүүн Б.Ундармаагийн эзэмшилд "Капитал" гээд нэг байлаа. АТГ-т мэдүүлсэн хөрөнгө орлогын мэдүүлгээр шүү дээ. Монголын томоохон банкуудын нэг л дээ. Гэвч нэг л өдөр дампуурлаа зарлаж, банкны салбараас гарч буйгаа мэдэгдэв. Цагтаа Монголын тэргүүн баячуудын нэг, хөрөнгөнийх нь хэмжээ 150 сая гаруй ам.доллараар хэмжигддэг гэж шар сонинд бичигдэж явсан Б.Ундармаа хатагтай УИХ-ын гишүүн болсноор түүний нөхөр А.Ариунболд бизнесийг нь атгасан гэхэд болно.

Тиймдээ ч банк дампуурсан хэргээр А.Ариунболдыг нь хуулийнхан онилж, бүр цагдан хорьсон удаатай. Түүнчлэн хууль хяналтын байгууллагаас ЖДҮ-гийн асуудлаар нэр бүхий гишүүдийг албадан дуудаж, шалгах гэсэн боловч шүүхээс баримтаар нотлогдоогүй гээд прокурорын саналыг хүлээж авахаас татгалзсан. Тэр ийм л аатай нэгэн. Хэдийгээр улс төрд хөл тавих болсноор хувийн бизнесээс холдсон гэж тайлбар хийсэн ч өөрийн л юм бол өөрийнх. Тиймдээ ч банкны нөхцөл байдал ямар байгааг мэдэж л байсан байж таарна. Гэвч улстөржилтөөс болж банк дампуурсан гэж асуудлыг бултуулахыг зайлуулсан. Ганц үнэн нь УИХ-ын 2016 оны ээлжит сонгуулийн сурталчилгаанд баруун солгойгүй хөрөнгө хаясан гэх. Үүнийхээ гороор цөөнгүй банкны үйл ажиллагаанд сөрөг нөлөө үзүүлсэн. Тиймдээ ч ЖДҮ-гээс зээл авч "мөнгө угаах" байдлаар шархаа нөхөхийг оролдсон гэх шуум байсаар ирсэн. Магад үнэн байхыг үгүйсгэхгүй. Хуулийн байгууллагаас идэвхийлэн шалгаж байгаа нөхцөлөөс харахад шүү дээ.

Тэгвэл эзэмшлийн банкаа дампууруулсан хатагтай УИХ-ын Өргөдлийн байнгын хорооны хуралдааны үеэр Монголбанкийг Засгийн газрын гар хөл болж, хамтарч ажилла гээд аашилж сууна. Бүр Монголбанкны удирдлагуудыг удаа суулгачихаад шүү дээ.

Хамгийн хачирхалтай нь, "Олон улсын валютын сан гэж хөлөө хугалчих гээд гүйгээд байсан. Хаана байна тэр, 300 сая ам.долларын санхүүжилт чинь. ОУВС гэрээгээ гүйцэтгэсэнгүй. Тэр мөнгөө оруулж ирээч" гэж улайм цайм аашлах юм. 

Уг нь бол ОУВС-гаас сангаас Монголын арилжааны банкуудыг акитваа нэмэгдүүлэх, орж ирсэн мөнгөнийхөө эх үүсвэрийг тайлбарлахыг шаардсан.  Энэ шаардлагыг зарим банкууд гүйцэтгэж амжилгүй мунгинаж буй. Тэдний нэг нь "Капитал" банк. Тиймдээ ч ОУВС-гаас орж ирэх ёстой байсан ээлжит санхүүжилт гацаад буй. 

Нэг үгээр хэлбэл, ОУВС-гийн шаардлага биелүүлж чадаагүй жагсаалтаас хасагдсан банкныхаа "өшөөг" Монголбанкны удирдлагуудаас нэхээд ч байгаа юм шиг харагдав. 

Ташрамд дурдахад, Засгийн газар, Монголбанкны мөнгөний бодлого, Сангийн  яамны төсвийн бодлого нь Монгол Улсын эрх ашгийн төлөө ажиллах ёстой. Нөгөөтээгүүр, хуулиар хараат бус, бие даасан байдлаар ажиллах ёстой Монголбанкийг Засгийн газрын гар хөл болоод ажилла гэж гэдэг нь Монгол Улсын нэгдмэл нэг байх ёстой бодлогыг тарамдуулах гэсэн хэрэг. Тиймдээ ч тэр үү, банк нь дампууруулсан гишүүн Монгол банкийг гар хөл болж ажилла гэж хэлэх нь санаатай алдаа биш болов уу. Тиймээс л хууль тогтоох байгууллагын гишүүн болсон юм бол үг хэлээ мэдэж, үйлдлээ хянаж байхыг эрхэм гишүүнд дайя.

Г.Маргад