Төр нийгмийн зүтгэлтэн С.Зориг агсны төрсөн өдөр өнөөдөр тохиож байна. Энэ өдөр түүний гэр бүл болон түүнтэй хамт мөр зэрэгцэн ардчиллын төлөө тэмцэж явсан хүмүүс хүндэтгэл үзүүлж, цэцэг өргөж байна. Тэдний нэг нь ШИНЭ намын төлөөлө байлаа. Энэ үеэр тус намын дарга, УИХ-ын гишүүн Ж.Батзандан "Бид энэ хүний үйл хэргийг үргэлжүүлнэ гэж бодож, зорьж явдаг. Үүнийгээ ч төрсөн өдөр бүрээр нь санаж явдаг. Үндэсний эрх ашгийг нэгдүгээрт тавьдаг, жинхэнэ бодит ардчиллыг цогцлоох зорилгоор Сүхбаатарын талбайд жагсаж явсан хүн. Авлигажсан, оффшоржсон, 30 гэр бүлийг баяжуулдаг ардчилал Монголд хэрэггүй. Тэр үүний төлөө тэмцээгүй, үүний төлөө амиа алдаагүй.

Монголын ард түмэн С.Зоригийн хүсэж байсан ардчиллыг хүсэж байгаа. ШИНЭ намын зүгээс үүнийг хэрэгжүүлэхийн төлөө тэмцэнэ. 

УИХ-ын гишүүн Л.Болд: Төр нийгмийн зүтгэлтэн С.Зоригийн амь насыг хөнөөсөн хэргийн гол буруутан өнөөдрийг хүртэл эрх чөлөөтэй явж байна. Түүний амь насыг хөнөөсөн хэрэг бол МАНАН-гийн том бөгөөд анхны аллага байсан. Тэр амиа алдсанаар олон хүний амийг хамгаалсан. Энэ бол үнэн шүү. Тухайн үед Монголоо гэсэн сэтгэлтэй, зүрхтэй болгоныг устгах гэж байсан хувилдаан болж байсан. Тэр бүхнийг С.Зориг амиараа хаасан. 

Гэхдээ Монголын ард түмний хурц ухааныг бөхөөхийн төлөө МАНАН-гийнхан эрчимтэй акц өрнүүлж байна. Коронавирусээс болж бидний тэмцэл саатаж байна. Гэхдээ Монголын ард түмний тэмцлийн гал бөхөхгүй, бид үргэлжлүүлэн тэмцэх болно. Монголын ард тооцоо хийх цаг ирнэ. Харж байгаарай. Жил бүрийн өдийд энд цугларч аймшигтай зүйл ярьдаг. Гэтэл бид ийм байх ёсгүй. С.Зоригийн талаар, ардчиллын талаарх сайн сайн зүйл ярих ёстой" гэсэн юм. 

Ташрамд дурдахад Санжаасүрэнгийн Зориг нь 1962 оны дөрөвдүгээр сарын 20-нд төрсөн бөгөөд Монголын Ардчилсан хувьсгалын хөдөлгөөний удирдагчдын нэг байв. XX зууны манлай улстөрч тэрбээр 1998 оны аравдугаар сарын 2-нд бусдын гарт амиа алдсан юм.