“Х.Бат-Ялалтыг суллах эсэх шүүх хуралд прокурор ирээгүй гэдэг шалтгаанаар хоёр дахь удаагаа хойшилж байна” гэсэн мэдээллийн талаар Нийслэлийн прокурорын газраас тодрууллаа.

Нийслэлийн прокурорын газраас Х.Бат-Ялалтад холбогдох эрүүгийн хэрэгт энэ сарын 10-ны өдөр Эрүүгийн хуулийн 17.6 дугаар зүйлийн 1 дэх хэсэгт зааснаар яллах дүгнэлт үйлдэн энэ сарын 13-нд Чингэлтэй дүүргийн Эрүүгийн хэргийн анхан шатны шүүхэд шилжүүлсэн. Гэвч шүүхийн харьяаллыг тогтоолгох шаардлагатай гэж тус шүүхээс буцаасан. Тиймээс тус прокурорын газраас хэргийн шүүхийн харьяаллыг тогтоолгохоор Улсын дээд шүүхэд хандсан. Ингээд энэ сарын 17-ны өдөр Чингэлтэй дүүргийн Эрүүгийн хэргийн анхан шатны шүүхэд харьяалал тогтоож ирүүлж өнөөдөр тус шүүхэд хэргийг хүргүүлээд байна.

Эрүүгийн хэрэг хянан шийдвэрлэх тухай хуулийн 14.1 дүгээр зүйлийн 3 дахь хэсэгт шүүхэд хэрэг хянан шийдвэрлэх явцад таслан сэргийлэх арга хэмжээг шүүх авна гэж заасан байдаг.

Өөрөөр хэлбэл, Х.Бат-Ялалтад холбогдох хэрэг нь шүүхийн шатанд байгаа учраас цагдан хорих таслан сэргийлэх арга хэмжээг өөрчлөх эсэх асуудалд прокурор оролцохгүй, тухайн шүүх хянан шийдвэрлэх хууль зүйн зохицуулалттай юм.

Х.Бат-Ялалтыг суллах асуудлыг хэлэлцэх шүүхийн хэлэлцүүлэгт прокурор ирээгүй гэдэг үндэслэлээр хойшилсон гэдэг нь ташаа мэдээлэл байна.