Нийслэлийн Онцгой, Эрүүл мэнд, Мэргэжлийн хяналт болон Байгаль орчны газраас цаг үеийн асуудлаар хамтарсан мэдээлэл хийлээ. Энэ үеэр "Нийслэлийн Онцгой комисс болон НМХГ-ын даргын холбогдох тушаал шийдвэрийн дагуу долдугаар сарын 10-15-ны өдрүүдэд нийслэлийн Мэргэжлийн хяналтын газрын 248 байцаагч холбогдох объектууд дээр, бэлэн байдалд 252 байцаагч буюу нийт 500 гаруй улсын байцаагч дээрх өдрүүдэд хяналт шалгалт хийж, бэлэн байдалд ажилласан" гэдгийг Мэргэжлийн хяналтын газрын дэд дарга Б.Батшагай хэлсэн юм. 

Өнгөрсөн өдрүүдэд Мэргэжлийн хяналтын газрын 70128012 дугаарын утсанд 14 дуудлага мэдээлэл иржээ. Тодруулбал:

• Барилгын техник хяналтын чиглэлээр 3
• Газрын тосны хийн хяналтын чиглэлээр -1
• Хөдөлмөрийн аюулгүй байдлын хяналтын чиглэлээр -1
• Эрүүл ахуй, халдвар хамгааллын хяналтын чиглэлээр -5
• Эмнэлгийн тусламж үйлчилгээний чиглэл -1
• Хүнсний чанар аюулгүй байдлын чиглэлээр -3 дуудлага ирсэн байна. 

Б.Батшагай дарга үргэлжлүүлэн хэлэхдээ "НМХГ-ын улсын байцаагчид Хүй долоон худаг, 13-р зуун цогцолборт хяналт шалгалт хийхэд зөвшөөрөлгүйгээр хуушуур болон холбогдох худалдаа эрхэлж байсан 19 иргэний үйл ажиллагааг таслан зогсоож, 150 мянган төгрөгийн торгууль тавьсан. Гэхдээ энэ жил худалдаа үйлчилгээ эрхлэх тусгай зөвшөөрөл олгоогүйтэй холбоотойгоор гарсан зөрчил өмнөх онуудтай харьцуулбал хэд дахин бага байлаа. 

Нэг ноцтой дуудлага ирсэн нь долдугаар сарын 14-ний өдөр Чингэлтэй дүүргийн 6-р хорооны 44-р байрны нэгэн айлд хийн газ дэлбэрч, байрны эд хогшил эвдэрч, хоёр иргэн нь түлэгдсэн явдал.

Дуудлагын дагуу НМХГ-ын холбогдох байцаагч газар дээр нь очиж ажиллахад тухайн байрныхаа шалыг доошоогоо цөмөлж, зөвшөөрөлгүйгээр тэр газраа газаа хэрэглэж байсан нь шалгалтаар илэрсэн.

Иймд манай байцаагч Зөрчлийн тухай хуулийн холбогдох хуулийн заалтын дагуу Чингэлтэй дүүргийн Цагдаагийн газарт харьяаллын дагуу шилжүүлсэн" гэв.

Мөн зориулалтын бус байранд, зөвшөөрөлгүйгээр хийн газыг ахуйн орчиндоо хэрэглэж, амь насаа эрсдэлд оруулахгүй байхыг анхааруулсан юм.

С.Сүлд