Зуны дунд хар морин сарын гурван хөх, хар нохой өдрийн морин цагт буюу энэ сарын 17-ны билэг сайн өдөр Монголын самбо бөхийн түүхэнд тэмдэглэгдэх үйл явдал тохиолоо. Монголын самбо бөхийн холбоо, дэлхийн стандартад нийцсэн иж бүрэн “Олимп спорт цогцолбор” ордны шав тавих ёслол Богдхан уулын дархан цаазат газрын хилийн зааг дотор орших Түргэний аманд боллоо.
Ёслолын үйл ажиллагаанд Монгол самбо бөхийн холбооны ерөнхийлөгч Д.Гэрэл, Монголын самбо бөхийн холбооны ерөнхий нарийн бичгийн дарга Б.Ариун-Эрдэнэ, Богдхан уулын дархан цаазат газрын хамгаалалтын захиргааны дарга Д.Батмөнх, Монголын самбо бөхийн холбооны дэд ерөнхийлөгч С.Нямдаваа, Монголын самбо бөхийн холбооны дэд ерөнхийлөгч Б.Ганболд, Монголын самбо бөхийн холбооны дэд ерөнхийлөгч Х.Ангар, Монголын самбо бөхийн холбооны дэд ерөнхийлөгч Э.Содномжамц, Монголын самбо бөхийн холбооны дэд ерөнхийлөгч Д.Гантөмөр, Монголын самбо бөхийн холбооны дэд ерөнхийлөгч П.Мөнхбаяр, Монголын самбо бөхийн холбооны спорт хариуцсан гүйцэтгэх захирал, МУГД Ж.Баярсайхан тэргүүтэй холбооны удирдах зөвлөлийн гишүүд оролцлоо.
Энэхүү “Олимп спорт цогцолбор” ордон нь: – Спорт заал, бэлтгэлийн заал, үзэгчдийн суудал, VIP заал, ресторан, эрэгтэй, эмэгтэй хувцас солих өрөө, душ, саун, бассейн, граш, машины зогсоол, сагс, хөлбөмбөгийн талбай, худаг, уурын зуух, нөөцийн цахилгаан станцт гэсэн бүтэцтэй бөхийн бүх төрлийн өвөл, зуны бэлтгэл цугларалт, сургуулилт хийх бүрэн боломжтойгоос олон улсын тэмцээн уралдааныг “Олимп спорт цогцолбор”-т зохион байгуулах боломжтойгоос гадна сагсан бөмбөг, гар бөмбөг, уран сайхны гимнастик, бокс зэрэг багийн болон ганцаарчилсан спортын төрлүүдийн тэмцээнийг хүлээн авах боломжтойгоор ордны барилгын зурагт тусгасан байна.
– Мөн соёл, урлагийн тоглолт, экспо, хурал зэрэг олон нийтийг хамарсан арга хэмжээ зохион байгуулах боломжтой. Монголын үе үеийн хүүхэд залуусын хүсэл мөрөөдөл болсон тус ордны газар шороо, суурийн ажил ийнхүү шав тавих ёслол хийснээр албан ёсоор эхэлж байгаа бөгөөд барилга угсралтын ажил хөрөнгө санхүүний боломж чадамжаас шалтгаалан 2020 оны арванхоёрдугаар сард дуусгахаар төлөвлөн ажиллаж байна.
