30-аас 31 дэх  Ерөнхий сайдаар улиран сонгогдсон У.Хүрэлсүх Засгийн газрын танхимаа бүрэн бүтцээр нь томилсноор ирэх дөрвөн жил буюу 2020-2024 онд ажиллах гүйцэтгэх засаглал албан ёсоор ажиллаж эхэллээ. Наадмыг "XIII зуун цогцолбор"-т зохион байгуулснаас хойш монголчууд бидний амралт, амрах хугацаа хараахан дуусаагүй байна. Гэхдээ наадмын дараа намар гэдгээр улиран сонгогдсон МАН-ын дарга, Засгийн газрын гишүүд түрүүчээсээ салбартайгаа танилцахаас эхлээд зарим шийдвэрийг гаргаж эхлээд байна. Тэдгээрийг ДУРДАХАД:

УИХ-ын дарга Г.Занданшатар энэ сарын 20-нд Дорноговь, Өмнөговь аймагт ажиллалаа. Дорноговь аймгийн Алтанширээ сумын нутагт баригдаж буй газрын тосны үйлдвэрийн бүтээн байгуулалтын ажилтай танилцсан нь энэ. Үйлдвэрийн авто болон төмөр зам баригдаж дуусжээ.  Одоо үйлдвэрийн барилга байгууламжийг бүтээн босгох ажилдаа орохоор болжээ.

 УИХ-ын гишүүн, Сангийн сайдаар парламент, танхимдаа улиран сонгогдсон Ч.Хүрэлбаатар ирэх сард товлон хуралдуулах ээлжит бус чуулганаар эхний ээлжид төсвийн тодотгол хийх талаар анхдугаар чуулганы үеэр тодотгосон байдаг. Энэ тухайгаа тэрбээр саяхан хэвлэлд өгсөн ярилцлагадаа онцлон дурдсан байна. Харин ирэх оноос төлж эхлэх Засгийн газрын нийт 2.9 тэрбум ам.долларын өрийг хэрхэн барагдуулах тухайгаа тэрбээр зарим тайлбарыг хийсэн байна. Тэрбээр "Засгийн газар үнэт цаасны дунд хугацааны стратегийг УИХ баталчихсан байгаа. Үүний дагуу шийднэ. Эдийн засаг, төсөвтөө дарамт учруулаад байхгүйгээр бондуудын төлбөрүүдийг шийдчихнэ" гэжээ.

Хууль зүй, дотоод хэргийн шинэ сайд Х.Нямбаатар энэ өдрүүдэд өөрийн салбарын эрхлэх хүрээний харьяа байгууллагад ажиллаж зарим чиг үүргийг өгөөд байна. Түүний хувьд Улсын бүртгэлийн ерөнхий газрын удирдлага болон хамт олон сүүлийн хоёр жилийн хугацаанд сайн ажилласан болохыг онцолж, танилцуулгатай холбогдуулан тодруулга авч, үүрэг, чиглэл өгсөн юм.

Үндэсний статистикийн хорооны даргаар ажиллаж байсан А.Ариунзаяаг сайд С.Чинзоригийн оронд томилсон нь олон хүний анхаарлын төвд орсон. Статистикийн байгууллагыг өнгөрсөн хугацаанд удирдаж, чиглүүлэхдээ эрхэлсэн үүргээ амжилттай биелүүлсэн түүнээс дорвитой шийдвэр хүлээх хүн олон. Сайд А.Ариунзаяагийн хувьд ажлаа авсан даруйдаа НҮБ-ын Монгол Улс дахь Суурин төлөөлөгч Тапан Мишраг хүлээж авч уулзжээ. Тэрбээр НҮБ-ын зүгээс дэлхий нийтэд дэгдсэн ковид-19 цар тахлын үед Монгол Улсад нийгмийн хамгаалал, хөдөлмөр эрхлэлтийн чиглэлээр дэмжлэг үзүүлэн хамтран ажиллаж байгааг дурдаад ковидын нөхцөл байдлаас үүдэн Тогтвортой хөгжлийн зорилтод хүрэх алхмаасаа ухарч болохгүйг онцгойлон анхаарах учиртайг онцолжээ. 

Ерөнхий сайд У.Хүрэлсүхийн баруун гар хэмээн тодотгосон Д.Цогтбаатар танхимдаа улирах сайдын нэгээр тодроод байсан ч УИХ дахь МАН-ын Бүлгийн Ажлын албаны даргаар ажиллаж байсан Н.Энхтайваныг томилсон байдаг. Мэргэжлийн дипломат тодотголтой түүний хувьд албандаа эргэн ирсэн нь түүнийг ямар шийдвэр гаргах бол гэсэн хүлээлтийг энэ салбарт үүсгээд байгаа юм. Сайдаар ажиллаж эхэлсэн Н.Энхтайван Турк Улсын Гадаад хэргийн сайд Мевлүт Чавушолутай утсаар ярьж, хоёр талын харилцаа, хамтын ажиллагааны өнөөгийн түвшинд сэтгэл хангалуун буйгаа илэрхийлээд дэлхий нийтээр тархаад буй шинэ коронавируст цар тахлын хөл хорионы улмаас нутаг буцах боломжгүй болсон Турк Улсад буй монгол иргэдэд Бүгд Найрамдах Турк Улсын Засгийн газраас шаардлагатай туслалцаа, дэмжлэг үзүүлэхийг хүсээд байгаа юм.

Ерөнхийлөгч Х.Баттулга Ерөнхий сайд У.Хүрэлсүхийн танхимд сонгогдсон сайд нарт ажлын амжилт хүсэх үеэр өөрийн эрхэлж байсан салбартай холбоотой асуултыг тухайн чиглэлийг удирдлагад дайсан нь анхаарал татсан. Түүний асуултын "бай", олон нийтийн сүлжээгээр шүүмжлэл дагуулаад байсан Хүнс, хөдөө аж ахуй, хөнгөн үйлдвэрийн сайд З.Мэндсайхан өнгөрсөн өдрүүдэд Дархан-Уул аймагт ажиллажээ. Түүний хувьд салбарынхаа уураг тархи болсон эрдэм шинжилгээ, судалгааны байгууллагуудад ажиллаж, эрдэмтэн судлаачдын санал бодлыг сонсчээ. 

Эрүүл мэндийн сайдаар ажиллаж асан Д.Сарангэрэлийг энэ салбартаа улирах болов уу гэсэн хүлээлт нийгэмд байсан ч түүнийг Байгаль орчин, аялал жуулчлалын сайдаар томилоод буй. Харин түүний эрхэлж асан салбарт Т.Мөнхсайханыг томилоод байгаа юм. Шинээр томилсон түүний хувьд анхны томилолтоо Говьсүмбэр аймгаас эхэлжээ. Тэрбээр "Эрүүл мэндийн салбарын удирдлагуудад хамгийн түрүүнд хөрөнгө мөнгө шаардахгүй хийж болох ажлуудыг аймагтаа сайн хийх хэрэгтэй" хэмээн онцолжээ.

Чиг үүргээс нь соёл, спортын салбарыг тусгаарласан Боловсролын сайдаар хэн очих вэ? гэсэн асуулт өнгөрсөн хугацаанд нийгэмд хүлээлт үүсгэсэн нэг асуудал байв. Харин өөр олгосон бүрэн эрхийн хүрээнд Ерөнхий сайд У.Хүрэлсүх Төрийн нарийн бичгийн даргаар ажиллаж байсан Л.Цэдэвсүрэнг дэвшүүлэн томилсон юм. Төрийн нарийнаас сайд болсон тэрбээр боловсролын чанарыг илүү сайжруулахад онцгой анхаарч, чадварлаг багш, чанартай боловсрол хөтөлбөр хэрэгжүүлэх, үнэлэмжийг ажлын чанартай уялдуулах, боловсролын зээлийн санг боловсролын хөгжлийн сан болгох, эрдэм шинжилгээ, судалгааны ажлын давхцлыг арилгах, чиглэл, үр дүнг сайжруулж, дэмжих талаар анхаарч ажиллахаа илэрхийлжээ.

Г.Эрхэс