Нийслэлийн Засаг даргаар ажиллаж байсан С.Амарсайхан ээлжит сонгуулийн үр дүнгээр УИХ-ын гишүүнээр сонгогдон, тангараг өргөсөн билээ. Энэ хүрээнд тэрбээр өмнөх ажлаа Нэгдүгээр орлогч Ж.Батбаясгаланд хүлээлгэн өгсөн юм. Өөрөөр хэлбэл, ирэх орон нутгийн сонгууль хүртэл Ж.Батбаясгалан нийслэлийн Засаг даргын үүргийг түр орлоно гэсэн үг. Хэдийгээр парламентын сонгуулийн үр дүн нэг намд үнэмлэхүй олонхийн байр суурийг олгосон ч Монгол Улсын хүн амын тэн хагасаас давсан оршин суугч амьдарч байгаа нийслэлийн удирдлагыг гартаа авсан эрхмүүд хэрхэн ажиллаж, үүрэг өгөхөөс орон нутгийн сонгуулийн үр дүн шууд хамаарах учиртай. Ялангуяа, нийслэлийн Засаг даргын Нэгдүгээр орлогчоос шийдвэр гаргах эрх бүхий гарын үсэг зурах чадамжтай болсон Ж.Батбаясгаланд хуулиар ямар эрх үүрэг олгож, хүлээлгэсэн, түүнийгээ яаж хэрэгжүүлж буй дүр зургийг өнгөрсөн 21 хоногоос дүгнэх гээд үзье. 

Нийслэлийн 33 дахь Засаг дарга С.Амарсайхан УИХ-ын гишүүнээр сонгогдсон тул хуулийн хүрээнд Нэгдүгээр орлогч Ж.Батбаясгаланд тамгаа хүлээлгэн өгснөөр орон нутгийн сонгууль хүртэл хот түр орлон гүйцэтгэгчээр ажиллахаар боллоо.2020.07.01

Ж.Батбаясгалан Нийслэлийн Засаг даргын үүрэгт ажлыг хүлээн авсан даруйдаа НЗДТГ-ын хэлтэс тасгийн дарга нар  болон нийслэлийн Ерөнхий менежер, харьяа байгууллагуудын удирдлагуудыг хамруулан хуралдлаа. Тэрбээр “Миний хувьд нийслэлд шинэ  хүн ирж, шинэ зүйл яриагүй гэдгийг та бүхэн сайн мэдэж байгаа,  өмнө нь бид хамтран ажиллаж ирсэн, цаашдаа ч хамтран ажиллана. Та бидний ажил үүрэг Нийслэлчүүдийн өдөр тутмын ажил амьдралтай холбоотой учраас хотын ажил нэг ч хором зогсох, цаг алдах учиргүй, Та бид өмнө хийж хэрэгжүүлж байсан ажлаа үйл ажиллагааг үргэлжлүүлэн хэрэгжүүлэх тул дарга нар дор бүрнээ хариуцсан ажилдаа эзэн болж ажиллах нь чухал" хэмээн онцолжээ. 2020.07.01

Хуулиараа Нийслэлийн Засаг дарга Үндэсний их баяр наадмыг зохион байгуулах хорооны дэд даргын албыг хариуцдаг. Энэ дагуу хотын даргын үүрэг гүйцэтгэгч Ж.Батбаясгалан тэргүүтэй Хурдан морины салбар хорооны гишүүд  Хүй долоон худагт ажиллаж баяр наадмын бэлтгэл ажлыг шалгажээ. Түүнийг ажиллах үеэр "Энэ жилийн Үндэсний Их баяр наадмыг бүхэлд нь “Монгол наадам” контент болгон боловсруулж, Олон Улсад аялал жуулчлалын бренд бүтээгдэхүүнээр түгээн сурталчлах видео бүтээл болгож авч үлдэнэ" гэдгээ “Hero” энтэртаймэнтийн захирал Б.Баатар хэлж байжээ. 2020.07.02

Улс, нийслэлийн төсвөөр хэрэгжиж буй төсөл арга хэмжээ, бүтээн байгуулалтын ажлын явцыг хэлэлцжээ. Энэ үеэр хөрөнгө оруулалтын ажлыг эрчимжүүлж, дүүрэг хороодод хийгдэж байгаа бүтээн байгуулалтын гүйцэтгэлд хяналт тавьж ажиллахыг газар, хэлтсийн дарга нарт үүрэг болгосон байна. 2020.07.03

 Давхар автобус явж эхэлснээр энгийн автобусаас 10 дахин хямд өртөг зарцуулахыг нийслэлийн удирдлагууд онцоллоо. 2020.07.06

Түр зурын усархаг борооны улмаас Нийслэлийн Баянгол дүүргийн нутаг дэвсгэр 25-р эмийн сангаас 3,4-р хороолол өгсөх зам эвдэрчээ. Үүнд эгдүүцсэн иргэд нийслэлд бүтээн байгуулсан авто замын насжилт, чанарыг борооны ус шалгасан тухай ярьцгаасан юм. 2020.07.06 

Үер, усны аюулаас сэрэмжилж хөдөлгөөнт болон завьт эргүүл ажиллаж байгаагаа нийслэлээс мэдэгдлээ. 2020.07.16 

Коронавирустэй тэмцэж байгаа шиг тарваган тахалтай тэмцэх шаардлага үүсч байна. Нийслэлийн Онцгой комиссоос өнөөдөр Иргэдийн эрүүл мэнд, аюулгүй байдлыг хангуулах шийдвэр гаргаж байна. Бид коронавирусийн эсрэг ямар хатуу арга хэмжээ авч байгаа билээ. Түүнтэй дүйцэхүйц байдлаар тарваган тахалтай тэмцэх шаардлага үүсч байна. Шалган нэвтрүүлэх товчоодод гэлтгүй хотоос гарах хөдөлгөөнд хяналт шалгалтыг явуулна. Иргэд бүгд нийтээрээ, бусдадаа шаардлага тавих хэрэгтэй. 2020.07.17

Нарны зам, Дүнжингаравын авто замыг холбосон нүхэн гарцын ажлыг эрчимжүүлэх үүрэг өглөө. Энэхүү замыг ашиглалтад оруулснаар Нарны замын ачааллыг Дүнжингарав руу хуваахаас гадна Офицеруудын ордны тойргоор заавал тойрохгүйгээр уг босоо тэнхлэгийн замаар зорчих боломж бүрдэнэ. 2020.07.21

С.Сүлд