Ерөнхий сайд асан С.Баяр нарт холбогдох хэргийг шүүх хурал Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд хоёр дахь өдрөө үргэлжилж байна. Прокуророос С.Баяр, Ч.Давааням нарт Төрийн албан тушаалтан албаны эрх мэдэл буюу албан тушаалын байдлаа урвуулан ашиглаж, улсад их хэмжээний хохирол учруулсан, мөнгө угаах, үндэслэлгүйгээр хөрөнгөжсөн зэрэг зүйл ангиар яллах дүгнэлт үйлдсэн гэх хэргийн шүүх хурал өчигдөр эхэлсэн юм.

Шүүх хурлаас өмнө нь буюу өнгөрсөн долоо хоногт  уг хэргийн холбогдогч С.Баярцогт, Б.Ариунсан, Б.Бямбасайхан, Д.Ганболд нарт ял оноосон байдаг. Мөн шүүхээс шүүгдэгч С.Баяр, Ч.Давааням нарын хэргийг тусгаарлаж, шүүх хуралдааны товыг жич зарлаад байсан нь энэ. Ингэхдээ шүүгдэгч С.Баяр, Ч.Давааням нарт урьд авсан таслан сэргийлэх арга хэмжээг хэвээр үлдээгээд байсан юм.

Тэгвэл Ерөнхий сайд асан С.Баяр "Монгол жиргээний түмэн сайн сууж байгаарай! Санаандгүй гомдоосон байх аваас уучилна уу. Явах өдөр байхад ирэх өдөр ирнэ. Салах өдөр байхад учрах өдөр ирнэ” хэмээн цахим орчинд өөрийн сэтгэгдлээ илэрхийлжээ.

Тэрбээр С.Баярцогт нарт ял оноосон шүүхийн шийдвэрийн тухай "Энэ бол муу жишиг. Сая ял авсан хүмүүс түүний команд. Командалсан салаагаа орхиод, голын нөгөө эрэг дээр ганцаараа гарч чанга хашгираад яах ч билээ" хэмээж байв.