Засгийн газрын өнөөдрийн ээлжит хуралдаанаас гаргасан шийдвэрийн дагуу БШУЯ-наас есдүгээр сарын 1-нд ерөнхий боловсролын сургууль, цэцэрлэгийн үйл ажиллагааг эхлэх болсонтой холбогдуулж мэдээлэл хийлээ.

Мэдээллийн эхэнд сайд Л.Цэдэвсүрэн "Бүх шатны сургалтын байгууллагын үйл ажиллагааг есдүгээр сарын 1-нээс эхлүүлэх Засгийн газрын шийдвэр гарлаа. Танхимын болон теле хичээл хосолсон хэлбэрээр сургалтын үйл ажиллагааг явуулахаар болсон. Цэцэрлэг, ЕБС-ийн хичээлийг есдүгээр сарын 1-нд, МСҮТ-ийн хичээлийг 14-нд, их, дээд сургуулийг аравдугаар сарын 5-наас эхлүүлэхээр шийдвэрлэсэн.

Ингэхдээ эцэг эх, асран хамгаалагч нартай хамтарч ажиллах хэрэгтэй болж байна. Танхимаар хичээллэх хүүхдийн тоо 20 байхаар тооцсон. Таван настай хүүхдийг цэцэрлэгт 100 хувь хамруулна. Цэцэрлэгт хамрагдаж чадаагүй хүүхдүүдэд теле хичээл явуулна. Их, дээд сургуулиудыг лекцийн хичээл телевизээр явна. Дадлагын ажил, семинар, лабораторийн хичээл танхимаар явуулахаар шийдвэрлэлээ.

Анги танхимын ариутгал цэвэрлэгээг мэргэжлийн байгууллагаар хийлгэнэ. Энгийн үеийн цэвэрлэгээнээс өөр. Хүүхэд хоорондын зай барих, хүүхдийн гарыг хоёр цаг тутамд угаалгах, ангид хепа шүүлтүүр тавих зэрэг шаардлага тавина. Танхимд судлах хичээлийн тоог багасгана. 1-12 дугаар ангид монгол хэл, математикийг танхимд, дунд ангид байгалийн ухааны, ахлах ангид лабораторийн хичээл танхимаар үзэх чиглэлийг барьж байна" гэв.
Харин Сургуулийн өмнөх боловсролын газраас "Улсын хэмжээнд цэцэрлэгийн насны нийт 309 мянган хүүхэд байна. 77235 нь хоёр настай. 0-3 насны хүүхэд хамгийн өвчлөмтгий байдаг. Цэцэрлэгийн хоёр настай хүүхдийн дархлаа, халдвар эсэргүүцэх чадвар сул байдаг тул есдүгээр сарын дунд үеэс эхэлж ханиад томуугаар өвчилдөг. Ханиад цэцэрлэгт голомтлон тархдаг учраас хоёр настнууд хамгийн эрсдэлтэй. Тиймээс гэрт нь байлгаж, эцэг эхийн дэмжлэгтэйгээр теле хичээл үзэх замаар насандаа тохирсон боловсролын үйлчилгээг авах боломжтой. Жилд дунджаар хоёр настай 48 мянган хүүхэд цэцэрлэгт явдаг" гэсэн мэдээллийг өглөө.

С.Сүлд