Ерөнхийлөгч өчигдөр нийслэлийн Сонгинохайрхан дүүрэгт амьдардаг ээжүүдэд “Эхийн алдар” одон гардуулсан байна. Ерөнхийлөгчийн зарлигаар энэ жил Сонгинохайрхан дүүргээс нийт 1,071 ээжид, үүнээс “Эхийн алдар” Нэгдүгээр зэргийн одонг 64, “Эхийн алдар” Хоёрдугаар зэргийн одонг 1,007 ээжид тус тус хүртээжээ.

Эдгээр ээжийн дотор УИХ-ын гишүүн П.Анужин, “Эхийн алдар” Хоёрдугаар зэргийн одонгоо энэ жил зэрэг гардан авахаар болсон эгч дүүс, 30 дугаар хорооны иргэд Пушкины Дунжидмаа, Пушкины Дунчимэг, Пушкины Дунцэцэг нар, мөн Нэгдүгээр зэргийн одонгоо авч буй 34 дүгээр хорооны иргэн, 71 настай Шаравын Нэргүй нар багтсан юм.

Энэ үеэр Ерөнхийлөгч Х.Баттулга "Үндэстэн бүр, улс гүрэн болгон ирээдүй хойчоо өсгөх, төлөвшүүлэн бойжуулахад онцгой анхаарал тавьж, төрийн бодлогыг хэрэгжүүлдэг. Эртнээс цөөн хүн амтай явж ирсэн Монгол Улс социализмын үед хүн амаа өсгөх бодлого хэрэгжүүлж, “Эхийн алдар” одонг бий болгосон. Энэ бол сайн жишиг, уламжлал учраас өнөөдөр монголын төр үргэлжлүүлэн авч яваа юм.

Ээж бүхэн хүүхдүүддээ хамгийн дотно, барагдашгүй хайр энэрлийн эх ундарга, гэрэл гэгээ нь болдог. Тийм болохоор монголын төр эхчүүддээ, хорвоогийн сайхан ээжүүддээ жилд ганц удаа талархал илэрхийлж, Монгол Улсын Ерөнхийлөгчийн зарлигаар “Эхийн алдар” одонг хүртээж, хүндэтгэл үзүүлдэг юм. 

Мянга гаруй ээжийн дундаас 10 дугаар хорооны иргэн Шаравын Нэргүй гуай “Эхийн алдар” Нэгдүгээр зэргийн одонгоо авч чадаагүй явсныг өнөөдөр олгож байна. 71 нас сүүдрийг зооглож яваа бууралдаа аз жаргал, эрүүл энх, сайн сайхан бүхнийг хүсэн ерөөе.

Мөн өнөөдөр хамтдаа одонгоо гардаж баяр хөөр болж байгаа эгч дүүс, 30 дугаар хорооны иргэд Пушкины Дунжидмаа, Пушкины Дунчимэг, Пушкины Дунцэцэг нарт талархал илэрхийлж, сайн сайхныг ерөөе.

Монголын төр нийгмийн хамгийн үнэт баялаг болох хүүхдийг эрүүл аюулгүй орчинд өсгөн бойжуулах, сурган хүмүүжүүлэх нөхцөлийг бүрдүүлэхэд анхаарч, тодорхой бодлогыг хэрэгжүүлэх замаар эхчүүдийг дэмжих, ирээдүй хойчоо хамгаалах ёстойг мартаж болохгүй. Төр энэ үүргээ биелүүлэхэд чиглэгдсэн бодлого боловсруулах, хэрэгжүүлэх чиглэлээр миний бие тодорхой ажлуудыг санаачилсан, цаашид ч шахаж шаардаж ажиллах болно” гэжээ.

Олон хүүхэд төрүүлж өсгөсөн эхчүүдэд “Эхийн алдар” одон гардуулах тухай Ерөнхийлөгчийн зарлиг 2020 оны тавдугаар сарын 29-ний өдөр гарсан ч дэлхий даяар тархсан коронавируст цар тахлын нөхцөл байдлын улмаас одон гардуулах үйл ажиллагааг хойшлуулаад байсан юм.

Энэ жил “Эхийн алдар” одонг улсын хэмжээнд 10,677, үүнээс Нэгдүгээр зэргийн одонг 720, Хоёрдугаар зэргийн одонг 9,957 ээжид хүртээх бөгөөд орон даяар “Өндөржүүлсэн бэлэн байдлын зэрэг”-т шилжүүлсэнтэй холбогдуулан засаг, захиргааны нэгжийн түвшинд үе шаттайгаар гардуулахаар болсон юм.

С.Сүлд