Гадаад харилцааны яамнаас цаг үеийн асуудлаар мэдээлэл хийлээ.

ГХЯ-ны Олон талт хамтын ажиллагааны газрын дэд захирал Д.Гэрэлмаа “Монголд Улсад үйл ажиллагаа явуулж буй НҮБ-ын Суурин зохицуулагчийн алба болон бусад олон улсын байгууллагатай хамтран цар тахал Монгол Улсын нийгэм, эдийн засагт хэр нөлөөлж байгаа талаар судалгаа хийсэн. Судалгаагаар цар тахлын нөлөө хүчтэй нөлөөлж байна. Ингэхдээ нөлөөлөл нь бүрэн мэдрэгдэж дуусаагүй. Цаашид 2-3 жил энэ байдал үргэлжилнэ гэсэн таамаглал дэвшүүлсэн.

Тухайлбал, ДНБ-ий 24 хувийг эзэлдэг уул, уурхайн салбарын өсөлт 30 хувиар буурсан нь эдийн засгийг 10.7 хувиар буурахад нөлөөлсөн гэсэн дүн гарсан.

Мөн 3 болон түүнээс дээш хүүхэдтэй өрх, залуу гэр бүл, хөгжлийн бэрхшээлтэй иргэн, ахмад наста цөөн тооны мал аж ахуй эрхэлдэг хүмүүс өртөж байна гэсэн судалгаа гарсан. Тиймээс НҮБ-тай хамтран хоёр жил хүртлэх авч хэрэгжүүлэх төлөвлөгөө боловсруулаад байна. Энэ хүрээнд эдийн засгаа сэргээх, нийгмийн суурь үйлчилгээг тэгш хүртээх, эрүүл мэнд, боловсролын салбарыг хөгжүүлэх зорилтын дэвшүүлэн төлөвлөгөөт ажил эхлүүлж байна. Уг ажилд 50 орчим сая ам.долларын хөрөнгө оруулалт шаардлагатай гэж үзсэн. Үүний тал хувийг НҮБ дангаараа гаргах бөгөөд үлдсэнийг бусад олон улсын байгууллага, Засгийн газар хамтран босгох шаардлагатай гэсэн тооцоолол гарсан.

Хоёрдугаарт, ДЭМБ-аас өгсөн мэдээллээр туршилтын өмнөх шатанд явж байгаа 139 вакцин туршилтын шатандаа орсон 30 вакцин байна. Үйлдвэрлэх хүртлээ туршилтын 3 үе шатыг дамжиж байж эрхээ авдаг. Одоогийн байдлаар 30 вакцины 3 нь хоёр, 6 нь гуравдугаар үе шатандаа явж байна гэсэн мэдээлэл байна.

Гадаад харилцааны яам, ДЭМБ, Эрүүл мэндийн яамтай хамтран цар тахлын эсрэг вакцин гарсан даруйд хамгийн түрүүнд Монгол Улсад нийлүүлэхээр ажиллаж байна. Монгол Улсын Дархлаажуулалтын тухай хуулиар ДЭМБ-аар хүлээн зөвшөөрөгдсөн вакциныг хүн амдаа хэрэглэнэ гэсэн заалттай. Тиймээс ДЭМБ-аар хүлээн зөвшөөрөгдсөн вакциныг хэрэглэнэ.

Гуравдугаар шатандаа явж байгаа вакцины гурав нь Хятадынх, хоёр нь Их Британи, нэг нь АНУ-ын эрдэмтдийн бүтээж байгаа вакцин” гэлээ.

А.Сүх