Авлигатай тэмцэх газраас “Жаст”-ын Ш.Батхүүг “Эрдэнэт” үйлдвэрийн 51 хувийг барьцаанд тавьж, Өмнөд Африкийн “Стандарт” банкнаас их хэмжээний зээл авсан хэрэгт яллагдагчаар татан шалгаж эхэлсэн билээ. Түүнтэй хамт “Алтжин” группын Ерөнхий захирал Г.Алтжинг нотлох баримтыг хуурамчаар үйлдсэн гэх үндэслэлээр яллагдагчаар татсан байдаг.

Тэгвэл тэдэнд холбогдох хэргийн шүүх хурал Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхэд өнөөдөр 10.00 цагт товлогдсон байсан ч хойшиллоо.

Энэ сарын 5-нд болсон шүүх хурлын үеэр шүүгдэгч Г.Алтжин нэмж өмгөөлөгч авч, өмгөөлөгч хэргийн материалтай танилцах, Төрийн банкны итгэмжлэгдсэн төлөөлөгч өөрийн өмгөөлөгчтэй шүүх хуралдаанд оролцох, шүүгдэгч Ш.Батхүүгийн өмгөөлөгч Ундрах-Эрдэнэ нэмэлтээр нэр бүхий гэрчүүд оролцуулах зэрэг хүсэлтүүд гаргасан тул шүүх хуралдааныг  хойшлуулж, өнөөдөр товлосон байсан юм.

Хэргийг нэхэн сануулбал, “Жаст”-ын Ш.Батхүү нарын зургаан хүн хуурамч бичиг баримт, тамга тэмдэг, хэвлэмэл маягт ашиглан  “Стандарт” банкнаас 109 сая ам.долларын зээл авч, бусдад онц их хэмжээний хохирол учруулсан хэрэгт яллагдагчаар татагдсан юм.

Тодруулбал, Нийслэлийн прокурорын газраас “Жаст групп” ХХК -ны захирал Ш.Батхүүг залилах, эрх мэдлээ урвуулан ашиглах, хуурамч бичиг баримт үйлдсэн, нотлох баримт хуурамчаар үйлдэх, мөнгө угаах гэмт хэрэгт, “Эрдэнэт үйлдвэр” ХХК-ны Ерөнхий захирлаар ажиллаж байсан Ч.Ганзоригийг эрх мэдлийг урвуулан ашиглах гэмт хэрэгт, “Эрдэнэт үйлдвэр” ХХК-ны Хуулийн хэлтсийн даргаар ажиллаж байсан Б.Мөнхжаргалыг эрх мэдлийг урвуулан ашиглах гэмт хэрэгт, “Эрдэнэт үйлдвэр” ХХК-ны Худалдааны хэлтсийн даргаар ажиллаж байсан Г.Амарбатыг эрх мэдлийг урвуулан ашиглах гэмт хэрэгт, “Алтжин групп” -ын Ерөнхий захирал ажилтай Г.Алтжинг нотлох баримт хуурамчаар үйлдэх, устгах мөн залилах гэмт хэрэгт холбогдуулан тус тус яллах дүгнэлт үйлдэн шүүхэд шилжүүлсэн юм.