Хувийн их, дээд сургууль болон цэцэрлэг сургуулийг суралцагчаас бүтэн төлбөр шаардахгүй байх шийдвэр гарсан. Энэ талаар БСШУС-ын сайд Л.Цэдэвсүрэн "Хичээлийн шинэ жил эхлэхтэй уялдуулан олон талт арга хэмжээ авч байна.

УОК-ын дарга, Эрүүл мэндийн сайд, БСШУС-ын сайд, Сангийн сайдын хамтарсан тушаалаар ЕБС-ийн сургууль, цэцэрлэг, хувийн сургуулиудын сургалтын төлбөрийн асуудлыг тодорхой зааж өгсөн. Энд эцэг эх болон асран хамгаалагчид санхүүгийн дарамт үзүүлэхгүйгээр боломжтой бол сар, улирлаар нь төлбөрийг авах талаар зааж өгсөн. Энэ талаар Хувийн цэцэрлэгүүдийн холбоо, их дээд сургуулийн консерциумтай хэд хэдэн удаа уулзаж хүсэлтээ хэлсэн.

Бидний зүгээс хувийн сургуулиудын төлбөрийн асуудалд шууд оролцох эрхгүй. Гэхдээ санал тавьж, асуудлыг цэгцлэх үүрэгтэй. Учир нь үүний цаана гэр бүлийн амьжиргааны орлого, хүүхдийн сурах эрхийн асуудал хөндөгдөж байгаа юм. Хүүхэд тайван, зөв орчинд сурах ёстой гэсэн зарчмыг баримталж байгаа. Энэ хүрээнд хүсэлтээ тавьсан" гэлээ.

Б.Лхам